Ministan Tsaro Ya Yi Gargadin Sake Dawowar Boko Haram Na Barazana Ga Nijeriya

Ministan tsaro, Mohammed Badaru, ya yi gargadin cewa dawowar mayakan Boko Haram a Arewa Maso Gabas, musamman a Jihar Borno, wani babban barazana ce ga zaman lafiyar a yankin Sahel da ya hada da Nijeriya, Jamhuriyar Nijar, Burkina-Faso da Mali.

Badaru ya bayyana gargadin ne a lokacin ziyarar aiki na kwana biyu a sassanin soja na Jihar Kaduna. Ministan ya bayyana haka ne ga ‘yan jarida jim kadan bayan ziyartar sassanin sojojin.

• Ma’aikatar Harkokin Waje: Kasar Sin Ta Kasance Gwarzuwa Wajen Samar Da Ci Gaba Ba Tare Da Gurbata Muhalli Ba
• Shugabannin Sin Da Amurka Sun Tattauna Ta Wayar Tarho

“Idan kana bin abin da ke faruwa a Jamhuriyar Nijar, Burkina Faso, da Mali, za ka ga cewa wadannan hare-haren sun karu a ko’ina.

“Akwai alama da ke nuna cewa mayakan sun dawo da karfinsu a yankin Sahel, sannan muna yin duk mai yiwuwa wajen sake tunkarar su,” in ji Badaru.

Ministan ya kara da cewa gwamnatin tarayya za ta ci gaba da yaki da wadannan ‘yan ta’adda, yayin da ya nuna kwarin gwiwa cewa za a samu zaman lafiya mai dorewa cikin wannan yanki.

“Idan za ku yi adalci a gare mu, a cikin makonni biyu da suka gabata, za ku ga cewa sojojin suna samun nasara wajen karya lagon ‘yan ta’adda, inda suka kashe su tare da tarwatsa sassaninsu,” in ji ministan.

A karshen makon da ya gabata, wadanda ake zargi ‘yan ta’adda na Boko Haram sun dasa na’urorin fashewa a Unguwar Guzamala na Jihar Borno, inda suka kashe mutane tara.