Mataimakin firaministan kasar Sin Ding Xuexiang, ya bayyana a jiya Jumma’a cewa, kasar Sin a shirye take ta yi aiki tare da kasar Rasha don ci gaba da daukaka amincewa da juna a fannin siyasa da karfafa dankon zumunci na cin moriyar juna.
Ding ya bayyana hakan ne a lokacin da yake ganawa da shugaban kasar Rasha Vladimir Putin. Mataimakin firaministan ya ce, a yayin da ake fuskantar gagaruman sauye-sauye a yanayin duniya, ya kamata Sin da Rasha su kiyaye cikakken tsarin hadin gwiwa bisa manyan tsare-tsare, da kare adalci a matakin kasa da kasa, da tallafa wa tsarin cinikayya tsakanin bangarori daban-daban na kungiyar WTO, tare da kiyaye gudanar da harkokin tsarin samar da kayayyaki cikin lumana, da zurfafa hadin gwiwa tsakanin sassa daban-daban ta hanyar dandaloli kamar na kungiyar hadin gwiwa ta Shanghai da na kawancen BRICS, ta yadda za su ba da gudummawa wajen bunkasa tattalin arzikin duniya bisa tsari mai kyau da daidaito a duniya.
A nasa bangaren, Putin ya ce, duk da matsaloli da kalubalen da ake fuskanta daga waje, dangantakar Rasha da Sin ta samu ci gaba a dukkan fannoni, kuma ta kai matsayin kolin da ba a taba kaiwa irinsa ba.
Ya bayyana kudirin kasar Rasha na kara karfafa hadin gwiwa a aikace tare da kasar Sin, da yin aiki tare don samar da makoma mai kyau ga kasashen biyu da ma duniya baki daya. (Mai fassara: Abdulrazaq Yahuza Jere)
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
