Aisha Buhari Ta Goyi Bayan El-rufai Kan Zargin Yi Wa Tunibu Zagon Kasa A Fadar Shugaban Kasa

Aisha, Uwargidan Shugaban Kasa Muhammadu Buhari, ta amince da ikirarin Gwamnan Kaduna, Nasir El-Rufai wanda ke zargin wasu a fadar shugaban kasa na yi wa dan takarar shugaban kasa na jam’iyyar APC, Asiwaju Bola Tinubu zagon kasa.

El-Rufai ya ce, masu yin zagon kasan a Aso Rock ba su wuce wadanda ‘yan takararsu suka sha kaye a zaben fidda gwani na jam’iyyar wanda kuma har yanzu suna cikin dacin rai.

• PDP Za Ta Fatattaki Jam’iyyar APC Daga Gidan Gwamnatin Jihar Kaduna –Makarfi

Aisha ta saka bidiyon ne a shafin Instagram dinta a ranar Laraba, sa’o’i kadan bayan El-Rufai ya yi wannan zargin yayin da ya bayyana a shirin Sunrise Daily na Channels Television.

Uwargidan shugaban kasa, wacce kuma ke jagorantar jirgin yakin neman zaben mata na Tinubu, ta rubuta wannan taken: “#longlivethefederalrepublicofnigeria” a kasan bidiyon da ta wallafa.

El-Rufai ya ce, wadannan mutanen masu yi wa Tinubu zagon kasa, suna fakewa ne da Shugaba Buhari don biyan bukatunsu.