Rundunar ‘Yansandan Jihar Katsina ta kama wata mata mai shekaru 25 bisa zargin kashe kishiyarta ta hanyar daba mata wuka a Daura, Jihar Katsina.
Lamarin ya faru ne da daddare a ranar 24 ga Mayu, 2025, a unguwar Sabon Gari da ke garin Daura, bayan wata hatsaniya ta gida da ta barke tsakanin matan biyu.
- ‘Yan Bindiga Sun Kashe Jami’an Tsaro 5 A Katsina
- Kotu Ta Yanke Hukuncin Kisa Kan Matashin Da Ya Kashe Kishiyar Mahaifiyarsa A Kano
A cewar kakakin rundunar, DSP Abubakar Sadiq, wanda ya fitar da sanarwa a ranar Lahadi, mijin matar, Nasir Yusuf, ne ya kai rahoton lamarin. Ya dawo gida misalin ƙarfe 11 na dare inda ya tarar da matarsa ta fari, Zainab Lawal mai shekaru 30, cikin jini tana kwance da raunukan sukar wuƙa da dama.
‘Yansanda daga ofishin Sabon Gari sun garzaya da ita zuwa Cibiyar Lafiya ta Tarayya da ke Daura, inda likitoci suka tabbatar da rasuwarta.
An kama wadda ake zargi, Rabi’a Labaran mai shekaru 23, wadda ke zaune a adireshi guda da mamaciyar, jim kaɗan bayan faruwar lamarin. A yayin bincike, ta amsa laifin da ake tuhumar ta da shi, tana mai bayyana cewa saɓani tsakaninta da mamaciyar ne ya rikiɗe zuwa rigima.
Kwamishinan ‘yansanda na jihar, CP Bello Shehu, ya ja hankalin al’umma da su guji tashin hankali a cikin gida, yana mai jaddada muhimmancin neman hanyoyin zaman lafiya da bin doka wajen warware matsaloli. Ya gargaɗi jama’a da kada su ɗauki doka a hannunsu domin hakan yana ƙara taɓarɓarewa da tauye adalci.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
