An Bude Bikin Fina-Finai Na Kasa Da Kasa Karo Na 27 Na Shanghai

An bude bikin fina-finai na kasa da kasa karo na 27 na Shanghai a babban dakin wasan kwaikwayo na birnin Shanghai na kasar Sin a jiya Asabar 14 ga watan Yunin nan, inda hukumar kula da harkokin fina-finai ta kasar Sin ta jagoranci gudanar bikin, kana babban gidan rediyo da talabijin na kasar Sin CMG, da gwamnatin birnin Shanghai suke karbar bakuncinsa.

Magajin garin Shanghai, Gong Zheng ya halarci bikin budewar, kuma ya sanar da kaddamar da bikin fina-finan, inda Wang Xiaozhen, mataimakin shugaban CMG, ya gabatar da wani jawabi.

Wang Xiaozhen ya ce fina-finai na dauke da abubuwan da jama’a ke nema da kuma kyakkyawan fatansu game da makomar rayuwa. A matsayinsa na mai shaida kuma mai samar da gudunmawa game da ci gaban harkokin fina-finan kasar Sin, CMG yana son yin aiki tare da abokan aiki masu tsara fina-finai da shirye-shiryen talabijin na gida da waje, don ci gaba da karfafa kuzarin kirkire-kirkire a ayyuka masu alaka da al’adu, da yin aiki tare don tabbatar da samun kyakkyawar makoma.

Bikin fina-finai na Shanghai na bana ya tattaro fina-finai sama da 3,900 daga kasashe da yankuna 119, adadin da ya kasance mafi yawa a tarihi. Daga cikin su, an yi rajistar fina-finai fiye da 2,800, don halartar gasar da ake yi, kana adadin fina-finan kasashen nahiyoyin Amurka da Afirka, da aka yi rajistarsu ya karu sosai bisa jimillar na bikin da ya gabata. (Bello Wang)