‘Yan sanda a yankin Tuckahoe da ke a kasar Amurka sun sanar da cewa, sun gano gawar tsohon Jakadan Nijeriya Ejeviome Otobo.
An dai yi wa Ejeviome ganin karshe ne a yankin a ranar 15 ga watan Yunin 2022, bayan kwana uku ba a sake ganisa ba.
Ofishin ‘yan sanda da ke a yankin na Tuckahoe ne, suka sanar da bacewar Ejeviome, inda kuma ta bukaci alummar da ke a yankin, da su taikama mata da bayanai a kan mamacin.
Amma a ranar 24 ga watan Yunin 2022 ofishin na ‘yan sanda ya sanar da cewa ya gano Ejeviome, inda suka kuma mika ta’aziyyarsu ga ‘yan uwan mamacin.
Ejeviome, ya mutu ya na da shekara 70 a duniya, inda kafin mutuwarsa ya rike mukamin Darakta da mataimakin shugaban sashe a ofishin wanzar da zaman lafiya na majalosar Dinkin Duniya a Amurka daga watan Disambar 2006 zuwa watan Oktoban 2013.
Ya kuma taba zama mukadashin mataimakin Sakatare-Janar na majalisar Dinkin Duniya daga watan Fabirairu zuwa watan Agusta na 2009.
