An Kama Dan Nijeriya Bisa Zargin Safarar Hodar Ibilis A Saudiyya

Hukumomin Saudiyya sun kama wani dan Nijeriya daya da ‘yan Saudiyya uku bisa zargin safarar hodar ibilis da ta kai nauyin kilogiram 2.2 a kasar.

Sashen binciken manyan laifuka na rundunar ‘yansandan kasar ya ce ya samu nasarar dakile yunkurin shigar da hodar ibilis zuwa biranen Riyadh da Jeddah.

• Ina Kammala Wa’adin Mulkina Na Biyu Zan Yi Ritaya Daga Siyasa – Gwamna Sule
• Sauyin Gwamnati: Wainar Da Ake Toyawa A Jihohin  Da ‘Yan Adawa Za Su Karbi Mulki

‘Yansandan sun ce mutanen hudu sun dade suna aikata laifin safarar hodar ibilis din tare da sayar da ita a cikin kasar ta hanyar amfani da wasu miyagun dabaru.

Jami’an ‘yansandan sun ce za a gurfanar da mutanen a gaban kotu da zarar sun kammala gudanar da bincike.

Safarar kwaya dai babban laifi ne a Saudiyya da za a iya yanke wa mutum hukuncin daurin shekaru masu yawa a gidan yari.