An Yi Garkuwa Da Shugaban Karamar Hukuma A Taraba, An Kashe Mai Tsaronsa

Wasu ‘yan bindiga dadi da ba a san ko su waye ba, sun yi garkuwa da Shugaban karamar hukumar Takum da ke jihar Taraba, Hon. Boyi Manja. 

Hatsarin ya faru ne a ranar Lahadi yayin da ke kan hanyar tafiya a yankin Kofai-Ahmadu da ke karamar hukumar Takum a kan babban hanyar Takum zuwa Wukari.

• An Damke Basarake Da Wasu Mutum 10 Bisa Zargin Hada Baki Da ‘Yan Bindiga A Kudancin Kaduna

Kazalika, dan sandan da ke ba shi kariya kuma an kashe shi a lokacin da ake garkuwan.

Kakakin hukumar ‘yansandan jihar Taraba, Abdullahi Usman, ya tabbatar da garuwar lamarin. Ya ce, tunin ‘yansansan da ke yankin da lamarin ya faru suka shiga cikin daji domin nemo inda aka boye Manja.

”Masu garkuwa da mutanen sun hau shingen bincike ne a lokacin da suka hango motarsa ​​ta nufo inda suka nemi direban ya bude jikin motar kuma ana cikin haka sai wadanda suka yi kwanton bauna suka bude wuta inda suka kashe ‘dan sandansa da ke ba shi tsaro.”

Ya ce, kwamishinan ‘yansandan jihar ya bada umarnin a farauto maharan tare da tabbatar da an ceto shugaban karamar hukumar.