Jam’iyyar APC a Jihar Borno ta ce kwamitin sulhu da ta kafa na ci gaba da ƙoƙarin warware saɓanin da ke tsakanin mambobinta, domin hana rikice-rikicen cikin gida da zasu iya rage mata damar samun nasara a babban zaɓen 2027. Shugaban jam’iyyar na jihar, Bello Ayuba, ne ya bayyana hakan yayin da yake zantawa da jaridar LEADERSHIP a Maiduguri, inda ya ce jam’iyyar na son shawo kan duk wata matsala kafin zaɓen.
Ayuba ya ce jam’iyyar ta kafa kwamitin sulhu ƙarƙashin jagorancin Ambasada Baba Ahmed Jidda, wanda aka ɗora wa alhakin tattaunawa da mambobin da ke da ƙorafe-ƙorafe domin warware matsalolinsu. Ya jaddada cewa APC za ta ci gaba da amfani da tattaunawa da sulhu wajen magance saɓani, yana mai cewa babu wanda za a tilasta masa ci gaba da zama a jam’iyyar idan ya yanke shawarar ficewa.
Ya ce APC ta yi ƙoƙarin tabbatar da adalci a zaɓen fidda gwani, inda ta bai wa masu neman zaɓen da suka buƙaci a yi zaɓen kai tsaye damar fafatawa, tare da amincewa da tsarin maslaha a wuraren da mambobi suka amince da shi. Ya ba da misalin wani ɗan majalisar wakilai mai ci da ya dage sai an yi zaɓen fidda gwani, amma daga baya ya sha kaye, yana mai cewa dole ne mambobi su mutunta sakamakon irin waɗannan zaɓuka.
Dangane da ƙarfin jam’iyyun adawa a kudancin Borno, Ayuba ya yi watsi da ra’ayin cewa yankin zai iya zama babban ƙalubale ga APC a zaɓen 2027. Ya ce jam’iyyar ta daɗe tana samun gagarumar nasara a yankin, inda ya misalta da Ƙaramar Hukumar Bayo, wadda ya ce APC ta samu ƙuri’u sama da 28,000 a zaɓen baya, yayin da PDP ta samu kusan ƙuri’u 2,000 zuwa 3,000. Ya kuma musanta zargin cewa gwamnatin APC na hana jam’iyyun adawa kafa ofisoshi ko rataya tutoci da allunan tallarsu a jihar.
Shugaban jam’iyyar ya kuma nuna ƙwarin gwiwar cewa APC za ta samu gagarumar nasara wajen samar wa Shugaba Bola Tinubu da Mataimakinsa Kashim Shettima ƙuri’u a zaɓen 2027. Ya ce ayyukan raya ƙasa da shirye-shiryen tallafa wa jihar da gwamnatin tarayya ke aiwatarwa za su ƙara wa jam’iyyar farin jini, yana mai cewa APC za ta ci gaba da wayar da kan masu zaɓe tare da bayyana nasarorin gwamnatin Tinubu a matsayin wani ɓangare na yaƙin neman zaɓenta.
