Jam’iyyar APC, ta lashe kujerun shugabannin kananan hukumomi 21 da na kansiloli 239 a jihar Kogi a zaben da aka gudanar ranar Asabar.
Mista Mamman Nda-Eri, Shugaban Hukumar Zabe Mai Zaman Kanta ta Jihar Kogi (KOSIEC), wanda ya bayyana sakamakon zaben a Lokoja, ya ce zaben ya gudana cikin kwanciyar hankali.
- Da Ɗumi-ɗumi: APC Ta Lashe Zaɓen Ƙananan Hukumomin Kaduna
- FIFA Za Ta Yi Wa Harkar Saye Da Sayar Da ‘Yanwasa Garambawul
“APC ce ta taka rawar gani, inda ta lashe dukkan kujerun shugabannin kananan hukumomi da kansiloli, ba tare da barin komai ba ga sauran jam’iyyun siyasa 18 da suka fafata a zaben.
“Sakamakon da aka bayyana a hedikwatar hukumar, jami’an zaben sun riga sun bayyana shi a cibiyoyin tattara sakamakon zaben.
“A matsayina na shugaban KOSIEC, na tabbatar da sakamakon da jami’an suka tattara a baya kuma suka kawo” in ji shi.
Ya godewa jami’an zaben da jami’an tsaro da masu sa ido da kuma manema labarai bisa goyon bayan da suka ba shi wanda ya sa zaben ya yi nasara.
