Tsohon mataimakin shugaban Kasa, Alhaji Atiku Abubakar Wazirin Adamawa ya Kai ziyarar Sallah ga tsohon shugaban ƙasa Muhammad Buhari a gidan sa da ke Daura ta jihar Katsina.
Kamar yadda Wazirin na Adamawa ya bayyana cewa ziyara ce ta gaisuwar Sallah ya kaiwa tsohon shugaban ƙasar da Mai Martaba Sarkin Daura.
Haka kuma ya kai irin wannan ziyara ta ban girma ga mai martaba sarkin Daura, Alhaji Umar Faruƙ Umar domin yin gaisuwa da sada zumunci.
Bayan kammala ziyarar a garin Daura tsohon mataimakin shugaban kasar ya wuce garin Katsina domin yin ta’aziya ga mai martaba sarkin Katsina, Alhaji Abdulmumini Kabir Usman na rashin ɗan Abdallah da ya yi a cikin wannan satin nan.
Atiku Abubakar dai ya ƙara miƙa ta’aziya da jaje ga al’ummar jihar Katsina na kashe-kashen ‘yan bindiga da suka addabi wasu yankunan jihar.
Kazalika tsohon mataimakin shugaban kasar ya kai irin wannan ziyara gidan marigayi tsohon gwamnan tsohuwar jihar Kaduna, Alhaji Lawal Kaita, bisa rasuwar babbar matarsa Hajiya Yalwa Lawal Kaita wanda ta rasu ana cikin hidimomin Sallah.
Daga cikin cikin waɗanda suka rufawa Wazirin Adamawa baya sun haɗa da tsohon gwamnan jihar Sokoto, Aminu Waziri Tambuwal da kuma jiga-jigan jam’iyyar PDP irin Dakta Mustapha Inuwa da Sanata Umar Ibrahim Tsauri da Hon. Mustapha Musa Yar’adua da Hon. Salisu Lawal Uli da sauran magoya bayan jam’iyyar PDP a Katsina.
