Ba Auren Jari Ya Sa Na Daina Fitowa A Fina-finai Ba -Sadi Sawaba

Tsohon jarumi a masana’antar Kannywood wanda ya kwana biyu ba tare da anji duriyarsa ko ganinsa a wani shirin fim ba ya ce ba auren jari ne ya sanya shi daina fitowa a fina finai ba kamar yadda wasu ke tunani.

Sadi Sawaba ya auri wata mata a Jihar Neja wadda aka ce babbar yar kasuwa ce a jihar ta Neja, hakan ya sa wasu ke ganin duba da cewar ya yi auren da ake kira auren jari ya sa aka daina ganin shi a cikin fina finai saboda a tunaninsu yanzu ya samu kudi ba zai wahalar da kanshi wajen neman kudi.

• Rungumar Harkar Noma Mafita Ce Ga Ma’aikata Masu Ritaya
• Kamfanin Simiti Na Dangote Ya Tallafa Wa Gidan Marayu Da Abinci A Lakwaja

Amma a hirar da ya yi da manema labarai Sawaba wanda ya ce shi malamin makarantar Boko ne a baya ya karyata wannan rade radin na auren jari wanda ya tabbatar da cewar duk da cewar matar da ya aura tanada abin hannunta sakamakon kasuwanci da ta ke yi amma a harkar gwamnati, ya fita karbar albashi mai tsoka saboda itama ma’aikaciyar gwamnati ce.

Ya kara jaddada cewar babban dalilin da ya sa aka daina jin duriyarshi a masana’antar Kannywood bai rasa nasaba da hassada da ya ce wasu suke yi mashi, a lokacin da yake a cikin masana’antar.

Wasu lokutan idan aka lura tauraruwarka ta na haskawa a masana’antar Kannywood sai ka samu wasu da za su dinga yi maka hassada da bakin ciki saboda suna ganin kana ci gaba da samun daukaka,to nima na hadu da irin wadannan mutanen saboda haka na yanke shawarar janye jikina daga Kannywood.

Amma ko alama babu wani maganar cewa auren jari ne ya sa na daina fitowa a fim illa dai kamar yadda na fadi wasu mahasaada be suka saka ni a gaba, ni kuma sai na janye jikina daga masana’antar domin kuwa bahaushe ya ce makashinka ya na tareda kai inji Sawaba.