Bangaren Samarwa Da Kera Kayayyaki Na Sin Na Sauyawa Zuwa Amfani Da Fasahohin Zamani Cikin Sauri

Ma’aikatar kula da masana’antu da fasahohin sadarwa ta kasar Sin, ta ce bangaren samarwa da kera kayayyaki na kasar, na samun sauye-sauye cikin sauri wajen komawa ga amfani da fasahohin zamani, inda sabbin masana’antu ke samun ci gaba cikin sauri.

Ta kara da cewa, kasar ta kafa wasu mizanai 50 na kasa da kasa wajen samarwa da kera kayayyaki bisa amfani da fasahohin zamani, haka kuma ta kasance mazauni ga kamfanoni sama da 6,500 masu warware matsalolin kera kayayyaki bisa fasahohin zamani, wadanda ke hidimtawa baki dayan bangaren kera kayayyaki na kasar.

• Jami’ar Kiwon Lafiya Ta Legas Za Ta Kara Samar Da Kwararru – Kwamishina
• Xi Jinping Ya Jajantawa Shugaban Mozambique Sakamakon Mahaukaciyar Guguwar Chido Da Ta Aukawa Kasar

Bisa mallakar tashoshin sadarwar 5G sama da miliyan 4.14, tuni kasar ta cimma burinta na shekarar 2025, na samar da tashoshin 26 ga mutane 10,000, lamarin da ke nuna ci gaban da kasar ta samu wajen samar da kayayyakin da ake bukata wajen amfani da fasahohin zamani.

Sauyin da ake samu cikin gaggawa na da alaka da managartan manufofin gwamnati. A kokarin gina wani adadi na masana’antu masu amfani da ingantattun fasahohi, a watan Oktoba, hukumomin kasar suka gabatar da wasu dabarun da kamfanoni za su bi wajen komawa ga amfani da fasahohin zamani a hankali, a cikin matakai 4. (Fa’iza Mustapha)