Kungiyar Ma’aikatan Tashoshin Ruwan Nijeriya (MWUN) sun yanke shawarar janye yajin aikin da suka shirya shiga saboda wasti ka’idojin aiki da kuma rashin doka da wasu kamfanonin mai na kasashen waje da kuma wasu ‘yan kwangila ke yi a harabar tashoshin Ruwan Nijeriya.
Sun yanke shawarar ne bayan da Shugaban Hukumar Tashoshin Ruwan Nijeriya (NPA), Mohammed Bello-Koko, ya shiga tsakanin shugabannin kungiyar ma’aikatan, (MWUN) da kuma wakilan kamfanonin mai na qasashe waje da suke takaddama da kungiyar.
- Haifar Da Ci Gaba Ya Fi Takara Muhimmanci
- Equatorial Guinea Za Ta Daukaka Huldarta Da Sin Zuwa Wani Sabon Matsayi, In Ji Shugaban Kasar
Da yake jawabi ga qungiyar ma’aikata a wurin taron, Mohammed Bello Koko, ya ce, “Za mu yi kokarin tabbatar fahimtar juna da mu’amala cikin mutunta juna don kare ma’aikata shiga yajin aiki, domin tattalin arzikin Nijeriya ba zai iya daukar yajin aikin ma’aikatan tashoshin ruwa ba a halin yanzu, zamu kare duk abin da zai kai ga rufe tashoshin Ruwan Nijeriya a wannan lokacin.”
Bayan taron ne shugaban qungiyar, MWUN, Adewale Adeyanju, ya umarci dukkan ma’aikata su gagauta komawa bakin aiki ba tare da bata lokaci ba.
An kamala taron tare da sanya hannu a takardar yarjejeniya fahimtar juna tsakanin kungiyar kwadago da kuma wakilan kamfanonin da ake takaddama da su.
