Buhari Ya Bude Rukunin Gidajen Da Gwamna Zulum Ya Gina Wa Malamai A Jihar Borno

Shugaban kasa, Muhammadu Buhari, a ranar Alhamis ya kai ziyara Maiduguri tare da kaddamar da wani sabbin rukunin gidajen da Gwamna Babagana Umara Zulum ya gina wa malamai a jihar.

Rukunin gidajen na daya daga cikin manyan ayyuka 600 wadanda Zulum ya aiwatar, an gina rukunin gidajen a yankin Bulumkutu, kan titin filin jirgi.

• Tubabbun ‘Yan Boko Haram Sun Gudanar Da Aikin Tsabtace Muhalli A Maiduguri
• Dan Sanda Ya Mutu A Harin Da ISWAP Ta Kai Hanyar Maiduguri-Damaturu

Baya ga wannan, Gwamna Zulum ya gina karin wasu gidajen a cikin makarantun sakandire da firamari domin malamai a fadin jihar.

Shugaban kasa ya isa a rukunin gidajen da misalin karfe 12 na rana tare da Gwamna Zulum da Mataimakinsa, Umar Usman Kadafur da Mataimakin dan takarar shugaban kasa a jam’iyyar APC, Sanata Kashim Shettima, tare da jiga-jigan gwamnatin tarayya dake yankin Arewa Maso Gabas.