A wannan makon mun kawo maku cigaban tattaunawar da muka kawo muku a fitowarmu ta makon da ya gabata. Kamar kowanne mako wannan shafi ya kan zakulo maku fitattun jarumai, har ma da masu tasowa daga cikin masana’antar shirya fina-finan Hausa ta Kannywood.
Tare da manyan mawaka har ma da kanana, kana da wadanda suka yi fuce. A yau ma shafin na tafe da bako na musamman wanda ya shafe tsahon shekaru goma a cikin masana’antar shirya fina-finan Hausa ta Kannywood, Jarumi mai taka rawa da kuma shirya fina-finai cikin masana’atar kannywood, kana shahararren mawakin wakokin Hausa da suka shafi kowanne bangare. JIBRIN YAHAYA wanda aka fi sani da MISTER D MAIWAKA, Ya bayyanawa masu karatu musabbabin fara wakarsa tare da dalilansa na shiga masana’antar Kannywood, har ma da wasu batutuwan da suka shafi sana’arsa ta fim. Ga dai yadda tattaunawar tasu da wakiliyarmu RABI’AT SIDI BALA Kamar haka:
Kana fidda bidiyos ne ko iya odiyo kake yi ?
Ina fidda ‘Audio’ da kuma Bidiyo.
Idan mutum yana son samun wakokinka ta wacce hanya zai nema?
Wakokina za a same su a ‘Youtube Channel’ dina mai suna ‘MD 24 TB’ ko a WhatsApp line kamar haka 08029157961 ko wurin ‘yan ‘Download’.
Wacce irin matsala kake fuskanta game da harkokin fina-finanku da kuma bangaren waka?
Matsala ba ta wuce ce-ce-ku-ce na mutanan gari wanda shi daman dan Adam ba a iya masa, kuma duk abin da za ka yi in kai bawa ka tsarkake zuciyarka duk abin da mutum zai fada yai ta fada domin Allah na kallon mu kuma zai wa bawa a kan aibata wanda ya ke yi.
Me za ka ce da su masu ce ce-ku ce a kanku?
Kalma daya ce su daina, hakan ba daidai bane. Domin ko da mutum bai haifa ba ‘yan uwansa sun haifa, kuma duk abin da kai za a yi ma wani, kairan o sharren.
Toh! Ya batun aure fa?
Ina da aure, Allah ya azurta ni da ‘ya’ya hudu, daya ta rasu Allah ya ji kanta. Uku na raye Khalid da Auwal, sai Fatima, Allah ya albarkace su Ameen.
Shin ka taba fuskantar wani kalubale daga wajen matarka game da aikinka, musamman ma yadda jama’a ke kallon yanayin aikin na cakude da wasu matan daban?
Gaskiya so daya na taba haduwa da hakan, shi ma ba wai na bacin rai bane, wani lokacin ne aka je aka ce da ita gani can da mata sai ta ce hanyar cin abincin sa ce a haka, Allah da ikonsa ni dai ban taba jin an ce gashi can an kama shi da wata mace ba, na ga a cikin garin nan kuma wanda baya fim ko waka an kama shi da mace ba. ita ta gayan ba matar aboki na ce take gaya min har ita ma matar abokin nawa ta ce ‘hanyar cin abincin sa ce a haka kuma ko wane bawa baya tsallake kaddarar sa.
Mene ne burinka na karshe a rayuwa?
Shi ne na gama da duniya lafiya.
Me za ka ce da makaranta shafin Rumbun Nishadi?
Su ci gaba da kasancewa tare da wannan shafi, domin karanta gaskiyar zance game da Jarumi ko Jaruma haka ma mawaka, domin shafi ne da yake fidda masu kallo daga cikin duhun ka ce na ce akan jarumi, irin na wasu mutanen.
Me za ka ce da ita kanta Jaridar LEADERSHIP Hausa?
Ina yi mata fatan alkhairi, ubangiji ya kara daukakata ya sa ta fi haka, ya karawa ma’aikatanta hazaka da basira.
Ko kana da wadanda za ka gaisar?
Kwarai kuwa, sai dai amma suna da yawa ba zan iya fado su ba, zan yi su a dunkule, bayan gaisuwa ga dukkanin iyayena, ‘yan uwana, da matata da kuma iyalaina baki daya, ina gaida duk wadanda suka zamo na kusa da ni abokaina da kuma masoyana a duk inda suke, da sauran al’ummar musulmi baki daya.
Muna godiya ka huta lafiya.
Ni ma na gode.
