Tamim Yahuza Abdullahi wanda aka fi sani da (TY) Shaba, a wata tattaunawar da ya yi da jarumar Kannywood Hadiza Gabon a cikin shirinta mai taken “Gabon’s Room Talk Show” ya bayyana abubuwa da dama da suka shafi rayuwarsa ta harkar fim da kuma ta zamowa mawaki wanda ya ce a yanzu ya daina waka sakamakon ganin da yayi cewa ba a nan Allah ya ajiye masa abincinsa ba.
Jarumin wanda ya shafe tsawon lokaci ana damawa da shi a masana’antar Kannywood a matsayin jarumi, mawaki, mai shirya fim da kuma mai daukar nauyi, ya bayyana tarihinsa inda yace shi haifaffen birnin Kano ne, wannan suna na T Y da akasarin mutane sukafi saninshi da shi ya samo asali ne tun daga lokacin kuruciya, na taso a gidanmu na iske yayana yana amfani da sunan D Y ma’ana Dauda Yahuza, hakan ya sa nima na takaita sunana domin ya zama kwatankwacin yadda ake kiran yayana saboda wannan inkiyar tashi a wancan lokacin ta na burgeni inji Tamim.
- An Daure ‘Yan Nijeriya Uku Shekaru 15 A Bisa Laifin Zamba A Indiya
- Amfanin Ganyen Mangwaro Ga Masu Ciki
Da yake amsa tambaya akan yadda ya samu Shaba a cikin sunanshi kuwa jarumin ya bayyana cewar sunan Shaba na sameshi ne a lokacin da nake karatu a Federal College Of Education (Technical) Bichi, a wancan lokacin akwai wani mawaki da ake kira Shaba Ranks to da yake ina matukar sha’awar wakokinsa sai ya zamana ina koyi da yanayin yadda yake waka har ma a wani lokaci aka shirya wani taro a makarantar sai na hau dandamali na rera wakokinsa cikin kwarewa.
To bayan na fito ne sai wata abokiyar karatuna ta kirani da wannan suna na SHABa cikin mutane, daga nan tun wancan lokacin sai ya zamana duk wani wanda bai san sunana ba yake kirana da Shaba, dangane da harkar waka kuwa ko da na shigo masana’antar Kannywood ni mawaki ne, domin kuwa na dade ina yin waka duk da cewa dai waka bata karbeni hannu biyu kamar yadda fim ya karbeni ba.
A kowane lokaci ina kiran kai na da wani wanda ko alama bashida basirar waka, hakan ya sa kacokan na hada kayana na koma na cigaba da yin fim a maimakon waka, ya kara da cewa, Shaba kuma ya bayyana wasu daga cikin abubuwan da suke ci wa masana’antar Kannywood Tuwo a kwarya kama daga rashin samun tallafi daga hukumomi da kuma rashin fadada ilimi a tsakanin jarumai, marubuta da masu shirya fina finan Hausa.
A masana’antar Nollywood dake Kudancin Nijeriya, manyan masu kudinsu, sarakuna, hukumomi da gwamnatoci na iyakar kokarinsu wajen ganin masana’antar ta cigaba, ta hanyoyi daban daban da suka hada da kayan aiki, wajen daukar fim, fadada ilimi, tallace tallace da sauran tallafi da masana’antar ke bukata, a wasu lokutan ma akan daukesu har kasashen Turai wajen koyon aiki da kuma tallata hajarsu ga manyan dillalan fim a Duniya wanda ta wannan hanyar sai su samu manyan kudade.
T Y ya cigaba da cewa idan ana maganar masana’antar Kannywood ba haka abin yake ba, domin kuwa a nan yankin sai mai shirya fim ya nemi gida ko kamfanin da zai shirya fim din sa ya rasa, hakan zai sa ya je ya dauki Hotel ko wani gidan haya domin gudanar da aikinsa wanda yace ta haka ne zakaga fina finai suna kamanceceniya da juna saboda kusan komai da komai a waje daya akayi su sakamakon rashin wurare.
Mu a nan arewacin Nijeriya har yanzu ba a daukemu a matsayin wasu da zasu iya kawo cigaba kokuma su samar da aiyuka ga matasa ba, shi yasa ba duk taimako ake mana ba saboda a nasu tunanin babu wani abin cigaba da zamu iya kawowa, yanzu ga misali wanda yafi kowane mutum dukiya a nahiyar Afirika dan arewa ne kuma bahaushe, amma idan yanzu ana son ayi fim wanda za a taka rawar babban mutum kamar Dangote ba lallai bane hakan ta faru.
Saboda ba za a samu isassun manyan gidaje ko manyan motoci da za ayi amfani dasu a fim din ba duk da cewa akwai su da dama, don haka ina kira ga manyan masu kudinmu, mahukuntanmu, sarakuna da gwamnatocinmu su yi kokarin taimakawa wannan masana’antar ta Kannywood da ake shirya fina finai da harshen Hausa ta kowane fanni, hakan zai sa muyi gogayya da takwarorinmu na gida da ma na kasashen waje inji TY Shaba.
Daga karshe ya bukaci matasa da su kasance masu biyayya da hakuri, da kuma jajircewa wajen ganin burikansu sun cika, yace dole ne sai an sha wuya akan sha dadi, kuma duk wanda suka gani a cikin masana’antar Kannywood babu wanda ya shigo a matsayin mai kudi, kowa a talaka ya fara kafin ya zama abinda ya zama, don haka kuma idan kukayi hakuri komai zai zo ya wuce ba tareda wata tangarda ba.
