Rundunar ‘Yansandan Jihar Kano ta tabbatar da mutuwar wani fitaccen jagoran ƙungiyar ƴan daba, Abba Bala Burakita, bayan wata arangama da wasu ƙungiyoyin daba abokan gabarsu a unguwar Dorayi da ke Kano.
Burakita, wanda ya yi ƙaurin suna wajen tayar da hankalin jama’a a yankin, ya mutu sakamakon raunukan da ya samu a yayin fafatawar, duk da an kama shi kuma aka kai shi Asibitin Murtala don jinya.
- Ma’aikaci Ya Mayar Da Dala 10,000 Da Ya Tsinta A Cikin Jirgi A Kano
- Rikicin Masarautar Kano: Sarki Bayero Ya Ƙaddamar Da Sabunta Ginin Fadar Nassarawa
Burakita ya yi fice a unguwar Dorayi, inda shi da ƙungiyarsa suka daɗe suna dagula zaman lafiyar jama’a. Ayyukansa na laifi sun sa ya zama abin farauta ga jami’an tsaro da dama, kuma mazauna yankin sau da dama suna kukan rashin tsaro, suna kira ga hukuma da ta ɗauki mataki a kansa.
A martanin da gwamnatin Jihar Kano ta ɗauka kan rikice-rikicen da Burakita da sauran ‘yan daba ke haddasawa, ta amince da gina sabon ofishin ƴansanda a Dorayi domin ƙarfafa tsaro da inganta hanzarin amsa kiran gaggawa.
Kakakin rundunar ‘yansandan Kano, SP Abdullahi Kiyawa, ya tabbatar da ƙudirin rundunar na ci gaba da tabbatar da zaman lafiya da tsaro a yankunan da rikicin ‘yan daba ke addaba a Kano.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
