Gwamnatin tarayya ta hannun Hukumar Kula da Sufurin Jiragen Sama ta Nijeriya (NCAA), ta sanar da dakatar da ayyukan kamfanin Max Air biyo bayan tsallake rijiya da baya da jirgin ya yi yayin sauka a filin jiragen sama a Kano.
Wani jirgin saman Max Air B734 mai lamba 5N-MBD, ya gamu da fashewar taya a filin jirgin saman Mallam Aminu Kano, a ranar Talata, 28 ga watan Janairu, 2025 da misalin karfe 10:51 na dare.
- Bikin Bazara Na Sinawa Ya Zama Biki Na Al’ummar Duniya
- Yadda Tayar Jirgin Saman Max Air Ta Kama Da Wuta Yayin Sauka A Kano
Wannan shi ne karo na uku da jiragen saman Max Air ke gab da gamuwa da hatsari a cikin watanni uku da suka gabata.
Sai dai, an kwashe fasinjoji 53 da ke cikin jirgin ba tare da jin wani rauni ba cikin aminci.
Ita ma Hukumar kula da Tsaro ta Nijeriya (NSIB) ta fara gudanar da bincike kan lamarin.
Amma hukumar da ke kula da harkokin tsaro, NCAA, a wata sanarwa da ta tabbatar da faruwar lamarin, ta ce za ta bayar da duk wani tallafin da ake bukata ga NSIB domin gudanar da cikakken bincike kan wannan lamarin.
Daraktan Hulda da Jama’a, Michael Achimugu a cikin wata sanarwa ya ce, “NSIB ce kadai za ta iya bayyana musabbabin wannan hatsarin idan ta kammala bincikenta.”
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
