Tsohon mataimakin shugaban jam’iyyar PDP na kasa, Olabode George, ya bukaci tsohon mataimakin shugaban kasa, Atiku Abubakar ya janye kudirinsa ya yin takara a 2027, saboda matasa masu jini a jika su samu daman yin takara.
DUK dai a hukumance Atiku bai fito fili ya bayyana aniyarsa ta yin takarar shugaban kasa a 2027 ba, amma wasu daga cikin masu taimaka masa sun bayyana cewa tsohon mataimakin shugaban kasan zai tsaya takara a zabe mai zuwa.
- Shugaban Karamar Hukuma A Kano Ya Yi Murabus, Wani Kuma Ya Fice Daga APC Zuwa NNPP
- Yawan Jarin Da Kasar Sin Ta Zuba A Ketare A Bara Ya Karu Kamar Yadda Ya Kamata
George ya bayyana hakan ne a lokacin ganawa da gidan talabijin na Arise, inda ya bayyana cewa Atiku zai cika shekara 18 a 2027, ya tsufa da mulkin Nijeriya.
A cewar jigon jam’iyyar PDP, ya kamata Atiku ya kasance mai mara wa matasan jam’iyyar baya maimakon ya tsaya takara a 2027.
George ya ce, “A yanzu haka dan’uwana Atiku Abubakar yana da shekaru 77, a 2027 kuwa zai kasance yana da shekaru 81. Ya kamata Atiku ya bai wa matasan Nijeriya daman tsayawa takara, domin su ne suke da jini a jika na iya mulkin kasar nan.
“Ya kamata Atiku ya kasance daya daga cikin dattawan kasar nan da za su dunga bayar da shawarwari,” in ji George.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
