Gwamnatin Jihar Gombe ta sanar da ɓullar cutar kwalara a ƙauyen Kedo, da ke gundumar Todi, ƙaramar hukumar Billiri, bayan samun rahotannin mutanen da ke fama da gudawa da amai.
Kwamishinan Lafiya na jihar, Farfesa Adamu Danladi Bojude, ya ce an samu rahoton mutuwar mutane biyu a ranar 4 ga watan Oktoba.
Ya ce an duba tare da yi wa mutane 74 da suke ɗauke da cutar magani kyauta, sannan aka sallame su.
A halin yanzu, babu wanda ke fama da kwalara da ke kwance a asibiti.
Kwamishinan ya bayyana cewa ya zuwa ranar 21 ga watan Oktoba, an shafe kwanaki bakwai a jere ba tare da samun rahoton mai ɗauke da cutar ba.
Ya ce za a iya ayyana ƙarshen ɓullar cutar a ranar 24 ga watan Oktoba idan ba a samu wanda yake ɗauke da cutar ba.
Gwamnatin ta buƙaci al’umma su kula da tsaftar jiki da muhalli, su kai rahoton duk wanda ake zargin ya kamu da cutar, sannan su garzaya asibiti da zarar sun fara ganin alamun cutar.
Ta kuma tabbatar da cewa ana ba da magani kyauta ga waɗanda ake zargin sun kamu da cutar a cibiyoyin kiwon lafiya da aka ware.
