Hukumar Yaki da Cin Hanci da Rashawa Mai Zaman Kanta (ICPC), ta kama jami’an bankunan kasuwanci a Abuja da Jihar Osun bisa zargin boye sabbin kudi.
Kakakin ICPC, Azuka Ogugua, ya ce hukumar na ci gaba wajen dakile masu boye kudin a bankuna.
- Canjin Kudi: Ina Sane Da Wahalar Da Mutane Ke Sha, Komai Zai Daidaita – Buhari
- Ana Gab Da Gabatar Da Kumfyutar Quantum Na Sin Mai Suna Wukong
Wata ma’aikaciyar banki, wadda ita ce shugabar reshen bankin Stanbic IBTC da ke Deidei a Abuja, an tsare ta saboda kin saka kudi a cikin injin ATM.
A lokacin da tawagar ICPC da ke sa ido a bankin suka kai samame bankin da misalin karfe 1:30 na ranar Juma’a domin tabbatar da bin doka da oda, sun bukaci a yi bayani kan dalilin da ya sa dukkanin injinan ATM babu kudi.
Sai dai shugabar ta bayyana cewar bankin bai samu kudi daga CBN ba.
Sai dai bayanan da jami’an ICPC suka samu sun nuna cewa reshen bankin ya karbi kudin ne da misalin karfe 11:58 na safe, kuma da gangan ya ki raba su ga mutane.
Wannan dai na zuwa ne bayan hadin guiwa da CBN ya yi da jami’an EFCC da ICPC don kama masu yi wa shirin canjin kudin zagon kasa.
Tuni da Babban Sufeton ‘Yansanda na Nijeriya, ya bayar da umarnin kama duk wanda aka samu na sayar ko boye sabbin kudin.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
