Hukumar zabe mai zaman kanta ta kasa (INEC) ta Jihar Katsina ta samar da karin na’urori sabunta rajistar katin zaben guda goma, domin yi wa mutane wandanda suka cancanta rajista a Jihar Katsina.
Bayanin haka na kunshe ne cikin wata sanarwa wadda jami’in huda da jama’a na hukumar, Aliyu Garba Adosa ya sanya wa hannu a madadin kwamishinan hukumar na jihar.
Kamar yadda sanar ta nuna, yin hakan abu ne mai matukar muhimmanci ganin cewa rajistar da aka fara ranar 28 ga watan Yunin bara za a kammala a ranar Alhamis, 30 ga watan Yunin wannan shekarar.
Bayannin ya kara da cewa karin na’urorin guda goma da aka samar domin yin rajistar katin zabe an kai su kananan hukumomi Bakori, Baure, Daura, Dutsin-ma, Faskari, Funtua, Kafur, Kankara, Katsina da kuma Malumfashi.
Ofishin hukumar zaben mai zaman kanta ta kasa da ke Jihar Katsina ya bukaci wadanda shekarunsu suka isa jefa kuri’ar zabe da su je su yi rajista cikin kwanaki da suka rage.
