Hukumar kula da jin daɗin alhazai ta birnin tarayya (FCT) ta saka ranar 1 ga Disamba, 2025, a matsayin ranar ƙarshe da za a biya kuɗin Hajji na shekarar 2026, wanda aka tsara a N7,696,769.76. Wannan sanarwa ta fito ne daga ofishin hukumar a yayin wata ganawa da manema labarai a ranar Litinin, inda jami’in hulɗa da jama’a, Muhammad Lawal Aliyu, ya buƙaci duk masu niyyar zuwa Hajji daga Abuja su bi ƙa’idojin da aka shimfida.
An bayyana cewa tabbataccen kuɗin Hajjin ya samu ne bisa ƙayyadadden tsari daga Hukumar Aikin Hajji ta Kasa (NAHCON), sannan duk biyan kuɗin za a yi ne ta hanyar Banki, domin tabbatar da gaskiya da rikon amana, ba tare da karɓar kuɗi a hannu ba. Aliyu ya ja hankalin alhazai cewa biyan kuɗin kafin wannan rana yana da matuƙar muhimmanci don tabbatar da samun kujerar shiga tafiya.
- Hajjin 2026: NAHCON Ta Kammala Tantance Masaukai Da Ɗakunan Dafa Abincin Alhazai A Madinah
- Yadda Sojoji Suka Tarwatsa Haramtattun Matatun Mai 14 A Yankin Neja Delta
Haka kuma, hukumar ta bayyana cewa ta fara shiri da masu aikin da hidima a Saudi Arabia, musamman wajen masauki da abinci a Makkah, domin inganta jin daɗin alhazai na FCT a shekarar 2026. Wannan yana cikin ƙoƙarin hukumar na tabbatar da cewa alhazai sun samu hidima mai inganci bisa tsarin shugabancin yanzu.
Sanarwar ta ƙara da cewa kammala biyan kuɗaɗe kafin wa’adin zai baiwa hukumar damar tsara jerin sunayen masu zuwa Hajji da kuma miƙa kuɗaɗen ga NAHCON a kan lokaci, domin gudun jinkiri a shirye-shiryen Hajji na shekara mai zuwa.
