Gwamnatin Jihar Zamfara, ta ce jami’an tsaro sun samu babbar nasara a yaƙi da ’yan bindiga bayan da suka kashe da dama daga cikin mayaƙan ƙasurgumin ɗan bindigar nan, Bello Turji.
Mai bai wa Gwamnan Jihar shawara kan harkokin tsaro, Ahmad Manga, ne ya tabbatar wa BBC Hausa hakan, inda ya ce wannan hari da aka kai wa Turji da mabiyansa an tsara shi ne sosai don kawo ƙarshen ayyukan ta’addancinsa.
- Sanatan Neja Ta Arewa Ya Yi Allah Wadai Da Kashe Sojoji A Mariga
- Cristiano Ronaldo Na Shirin Tsawaita Kwantiraginsa A Kungiyar Al-Nassr
Ya ce jami’an tsaro sun kai farmaki maɓoyarsu da ke dajin Cida, a Ƙaramar Hukumar Shinkafi ta Jihar Zamfara.
“Muna gode wa Allah. An gano Turji a maɓoyarsa, waje ne da jami’an tsaro ba su taɓa shiga ba. Yanzu ya gane cewa ba zai iya ɓoyewa har abada ba,” in ji Manga.
“An kashe mayaƙansa da dama, duk da cewa ba a tabbatar da adadinsu ba tukuna, amma mun san ya yi babban rashi.”
Yawan gawarwakin da aka tsinta bayan harin duk na mabiyansa ne.
Ɗaya daga cikin su, Bashari Maniya, wanda tsohon ɗan bindiga ne da ya ce ya tuba kuma ya fara taimaka wa jami’an tsaro, shi ma ya mutu bayan motar da yake ciki ta faɗa rami mai zurfi.
Manga ya bayyana cewa ba da bindiga aka kashe Maniya ba, saɓanin jita-jitar da ke yawo.
“Sabuwar mota ce, kuma ba su san dajin sosai ba. Yayin da suke gudu a cikin daji, sai suka faɗa cikin wani rami mai zurfi. Motar ta kife, kuma an kasa ciro ta cikin sauƙi,” in ji shi.
Ya ce lokacin da aka zo taimaka musu, an same su a cikin motar a sume. Motar ba ta da kariyar harsashi, amma hatsarin ya jikkata su sosai.
Mai ba da shawarar ya ƙara da cewa Gwamna Dauda Lawal yana da cikakken goyon bayan ganin an kamo Bello Turji.
“Ba za mu haƙura ba sai mun murƙushe Turji. Mutanen Zamfara, musamman ma a Shinkafi, sun san irin azabar da ya jefa su ciki fiye da shekaru 14 da suka wuce,” in ji shi.
Manga ya ce gwamnati na shirin ƙara tura sojoji domin ƙarfafa yaƙi da ƙungiyar Turji da sauran ’yan ta’adda a jihar.
