Jimilar Darajar Hada-Hadar Shige Da Fice A Fannin Bayar Da Hidimomi Ta Kasar Sin Ta Kai Yuan Tiriliyan 3.9 A Rabin Farko Na Shekarar Bana

A yau Laraba, ofishin yada labarai na majalisar gudanarwar kasar Sin, ya gudanar da taron manema labarai, domin gabatar da cikakken bayani kan yadda ake samun ci gaba, a fannin cinikayyar hidimomi ta kasar Sin, da kuma yadda ake shirye-shiryen bikin baje kolin kasa da kasa na kasar Sin na 2025, game da hada-hadar cinikayyar ba da hidimomi ko CIFTIS.

Bayanan da aka gabatar, sun nuna cewa a rabin farko na shekarar bana, jimilar hada-hadar shige da ficen cinikayyar ba da hidimomi ta kasar Sin ta kai yuan tiriliyan 3.9, adadin da ya karu da kashi 8 cikin dari bisa na makamancin lokaci na shekarar bara, wanda hakan ya kafa sabon tarihi a daidai wannan lokacin.

Bugu da kari, an bayyana cewa za a gudanar da bikin CIFTIS na shekarar 2025 a birnin Beijing, tsakanin ranakun 10 zuwa 14 ga watan Satumba dake tafe, kuma an kammala galibin ayyukan shirye-shirye.

Bikin CIFTIS na bana, zai kunshi nune-nune daga kasashe, da hukumomin kasa da kasa sama da 70. Kuma kusan kamfanoni 2,000 ne suka shirya shiga bikin a zahiri. (Safiyah Ma)