Assalamu alaikum masu karatu, barkan mu da sake haduwa da ku a wannan makon cikin shirin namu mai farin jini da albarka na Ko Kin San.
A yau shafin namu zai yi magana ne a kan abin da ke kashe gaban mace, wannan kuwa yana faruwa ne ta hanyar rashin ba wa wurin kyakkyawar kulawa. Ga dai abin da ya dace mata su rika yi domin kauce wa lalacewar gabansu.
Ya kamata mata ku kiyaye gabanku saboda waje ne mai kima da daraja kuma waje ne da yake bukatar kulawa sosai wajen tsaftace shi. Daga abubuwan da ke kashe gaban mace akwai: warin gaba, ciwon sanyi, kaikayin gaba da kurajen gaba.
To me yake kawo wadannan abubuwa?
Abin da yake kawo su su ne, hada tsarkin bayan gida (kashi) da fitsari.
Wannan yana kawo cutar ciwon sanyi sosai, ya kamata ku san yadda za ku rika tsarki kowanne ku yi shi daban.
Sai ki ga mace idan ta gama saduwa da mijinta ta kwanta sai 9 na safe sannan ne za ta yi wanka, wannan ma yana kawo ciwon sanyi idan har ba ki yi tsarki ba bacci yana iya dauke ki.
Sannan wasu tun suna kanana suke haduwa da shi.
Yana da kyau iyaye mata su dinga hana `ya’yansu cin abinci idan suna (kashi), sannan kuma a koya musu tsarki sosai.
