Kotun ƙolin Nijeriya ta yi watsi da hukuncin wata kotun ɗaukaka ƙara ta ƙasar wadda ta ce madugun ƴan awaren Ipob, Nnamdi Kanu ba zai fuskanci shari’a ba kasancewar an kama shi ne ba bisa ƙa’ida ba.
BBC ta rawaito cewa, saboda haka alƙalan kotun suka ce za a ci gaba da yi wa Kanu shar’ia.
- Hatsari Ne Babba Sakin Nnamdi Kanu —Asari Dokubo
- Kungiyoyin Arewa Sun Yi Fatali Da Bukatar Sakin Nnamdi Kanu
A yau Juma’a ne kotun ta yanke wannan matsaya kan Nnamdi Kanu, wanda ke da mabiya a ciki da wajen Nijeriya.
Shari’ar Nnamdi Kanu ta baya-bayan nan ta faro ne tun daga shekarar 2021, daga Babbar kotun tarayya da ke Abuja.
Wannan dai shi ne kat, game da batun ko za a saki Nnamdi Kanu ko a’a, kasancewar ba za a iya ɗaukaka ƙara ba.
A shekarar 2015 ne aka kama Mr Kanu amma ya tsere daga Nijeriya a 2017 bayan an bayar da shi beli.
Ya kasance a tsare tun 2021 lokacin da aka tasa ƙeyarsa daga Kenya domin fuskantar tuhume-tuhumen ta’addanci.
A watan Oktobar bara ne, wata kotun ɗaukaka ƙara ta bayar da umarnin a saki Mista Kanu inda ta ce akwai kura-kurai a shari’ar.
Sai dai gwamnati ta sake shigar da ƙara inda ta ce Kanu barazana ce ga tsaron Nijeriya.
Wasu shugabannin yankin kudu maso gabashin Najeriya sun nemi a saki Kanu.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
