Kungiyar Tsoffin Jami’an NIS Ta Yaba Da Nadin Sabuwar Kwanturola Janar Ta Hukumar 

Kungiyar tsoffin ma’aikatan hukumar Shige da fice ta Kasa (NARIO) ta kai ziyarar ban girma ga sabuwar Kwanturola Janar ta Hukumar Shige da fice  ta kasa (NIS), Kemi Nanna Nandap, a ranar 27 ga Maris, 2024.

Shugaban kungiyar na riko na kasa, kuma tsohon mataimakin Kwanturola Janar na NIS, Ezekiel S Kaura, da sauran tsoffin jami’an sun isa hedikwatar hukumar ne da ke Abuja domin taya sabuwar Shugabar, CGI Kemi N. Nandap murnar nadin da aka yi mata a matsayin shugabar hukumar NIS ta 19.

• Me Ke Jawo Hankalin Kamfanonin Kasa Da Kasa Zuwa Sin?
• ‘Yansanda Sun Kashe ‘Yan Bindiga 2 A Benuwe

Da yake jawabi a yayin taron, shugaban riko na NARIO na kasa, ya bukaci sabuwar shugabar da ta jajirce wajen samar da kwararrun ma’aikata masu kwazo da za su sanya ayyukan hukumar gaba wajen samar da tsaron kasa.

Shugaban rikon ya shawarci sabbin shugabannin hukumar, da su yi hadin gwiwa don karfafawa da inganta ayyukan hukumar akan iyakokin kasa tare da ba da shawara kan inganta ayyukan tattara bayanan sirri kan batun masu yin kaura.

A jawabinta CGI Kemi N. Nandap ta godewa kungiyar bisa wannan ziyarar, ta kuma jaddada cewa, kofofinta a bude suke domin inganta hulda da hadin gwiwa. Ta ba da tabbacin cewa, za a yi nazari sosai kan shawarwari da kungiyar ta gabatar domin aiwatar da su.

Daga cikin mambobin kungiyar da suke cikin tawagar sun hada da ACG Usman Abdullahi, pcc, mni (rtd) CIS Kayode Musa (rtd), CIS AI Ogar, pcc (rtd) da dai sauransu.