Kwamishinan Benuwe Da Aka Sace Ya Kubuta

Kwamishinan Gidaje da Raya Birane na Jihar Benuwe, Ekpe Ogbu, ya kubuta daga hannun ‘yan bindigar da suka sace shi.

Kakakin rundunar ‘yansandan jihar, SP Catherine Anene, ta tabbatar da sakin kwamishinan a yammacin ranar Talata a dandalin yada labarai na rundunar.

• An gudanar da taron tunawa da marigayi Jiang Zemin
• An Debo Samfuran Binciken Kimiyya Daga Tashar Sararin Samaniya Ta Sin

A baya dai an samu labarin cewa masu garkuwa da mutane da suka sace shi, sun bukaci a biya su Naira miliyan biyar.

An ce an yi garkuwa da kwamishinan ne a mahadar Adankari da ke kan hanyar Otukpo zuwa Ado a ranar Asabar.

Gwamnatin jihar, wacce ta bayyana cewa, motar Hilux da ya ke tafiya a ciki, ‘yansanda sun gano ta a gefen hanya a Otukpo a ranar Asabar.

Amma rundunar ta sha alwashin ceto kwamishinan ba tare da ya ji wani rauni ba.