Ƙungiyar Ma’aikatan Manyan Hukumomin Gwamnati da Kamfanonin Gwamnati (SSASCGOC), reshen Hukumar Kula da Abinci da Magunguna ta Ƙasa (NAFDAC), ta ƙaddamar da shiga yajin aiki na sai baba-ta-gani kan rashin magance batutuwan walwala na ma’aikata.
A cewar wata sanarwa da aka fitar ranar 4 ga Oktoba, 2024, ƙungiyar ta bayyana gazawar shugabancin hukumar wajen warware matsalolin da suka shafi ƙarin girma, da albashi, da walwalar ma’aikata duk da tattaunawa da aka yi a baya.
- An Shawarci NAFDAC Ta Bullo Da Dabarun Fasaha Wajen Yaki Da Jabun Magunguna
- NAFDAC Ta Yi Bikin Lalata Kayayyakin Jabu Na ₦985.3m A Kano
Kungiyar, ta hannun Sakataren TUC, Kwamared (Dr.) Ejor Michael, ta sanar da cewa yajin aikin zai fara ne daga ranar Litinin, 7 ga Oktoba, 2024. Wannan matakin ya biyo bayan cikar wa’adin kwanaki 14 da aka bai wa shugabancin NAFDAC a ranar 20 ga Satumba, 2024. SSASCGOC ta jaddada cewa ba za a bari kowane ma’aikaci ya shiga wani ofishin NAFDAC ba yayin yajin aikin.
Sanarwar ƙungiyar ta yi kira ga dukkan ma’aikatan da su bi umarnin yajin aikin, tare da cewa za a ci gaba da yajin aikin har sai an cika dukkan buƙatun da aka gabatar a cikin sanarwar da aka fitar a baya.
Haka zalika, an umarci dukkan shugabannin jihohi da na yankuna da su tabbatar da cikakken bin wannan umarni na yajin aiki.
Daga kanmu, magana ta ƙare. Kuna iya samun rahotanni da ɗumi-ɗuminsu da gamsassun ruwayoyin labarai daban da na saura kai-tsaye cikin wayoyinku. Shiga zaurenmu na WhatsApp don sanin halin da ake ciki a duniya ko yaushe
Shiga zaurenmu na WhatsApp
