Manyan Jami’an Tsaro Ba Za Su Huta Ba Har Sai Nijeriya Ta Samu Zaman Lafiya – Buhari

Shugaba Muhammadu Buhari ya yi tir da kisan da ‘yan Bindiga suka yiwa Babban Malamin Cocin Catholic Diocese, John Cheitnum a Kafanchan jihar Kaduna.

Buhari ya ce, tabbatar da tsaro ga ‘yan Nijeriya shi ne babban abinda Gwamnatinsa ta mayar da hankali a kai, inda ya kara nanata cewa, Gwamnatinsa za ta yi dukkan mai yiwuwa wajen kawo karshen hare-haren ‘yan Bindigar.

• ‘Yan Bindiga Sun Kashe Fasto Bayan Karba Kudin Fansa A Kaduna

Shugaban wanda ya bayyana hakan a cikin sanarwar da mai taimaka masa a harkar yada labarai, Garba Shehu ya fitar a Abuja, ya ce, manyan jami’an tsaro na kasar nan ba za su huta ba har sai an samar da cikakken tsaro a kasar nan.

Buhari ya kuma Mika ta’aziyyarsa ga iyalai da ‘yan uwa da kungiyar CAN da kuma Gwamnatin jihar Kaduna bisa kisan Malamin cocin.

An dai tsinci gawar Fada John Cheitnum ce a ranar 19 ga watan Yulin 2022.
,