Mataimakin Kwanturola Da Ke Kula Da Gidan Yarin Kuje Ya Rasu

Daruruwan al’ummar Musulmi sun halarci sallar jana’izar mataimakin kwanturolan gidan gyaran hali na Kuje da ke Babban Birnin Tarayya (Abuja), Bello Aliyu Dayi.

Shi dai Bello Dayi ya rasu a ranar Alhamis da ta gabata a wani asibiti mai zaman kanshi da ke Jihar Katsina bayan ya yi fama da jinya.

• ‘Yan Sanda Sun Cafke Fursunan Da Ya Tsere Daga Gidan Yarin Kuje A Kaduna

An samu rohoton cewa Alaramma Adamu Dayi ne ya jagoranci sallar jana’izar mamacin.

Daga cikin wadanda suka halarci sallar jana’izar sun hada da kwanturolan gidan gyaran hali na Jihar Katsina da kwamandan makarantar horas da jama’an hukumar hana sha da fataucin miyagun kwayoyi ta kasa wadda ke Jos, Hamza Umar Dayi da Daraktan yakin neman zaben jam’iyyar NNPC, Nasiru Dayi.

Haka nan kuma sallar jana’izar ta samu halarcin malaman addinin musulunci, ‘yan kasuwa, abokan karatun mamacin da dai sauran su.