Matasa 3 Sun Shiga Hannu Kan Kashe Wani Mutum Don Mallakar Filinsa A Kano

An kama wasu matasa uku a yankin Gaida da ke karamar hukumar Kumbotso a Jihar Kano, zargin kashe wani mutum mai shekaru 32, Dahiru Musa, saboda su mallaki filinsa. 

‘Yansandan jihar, sun ce matasannsun hada baki da yaron marigayin wajen kitsa yadda za su kashe shi bayan sun yaudare shi wajen cinikayyar fili.

• Ban Yi Nadamar Yakar PDP A Zaben 2023 Ba – Wike
• Ba Mu Da Hannu A Kara Farashin Man Fetur – Gwamnatin Tarayya

Daya daga cikin wadanda ake zargin, Aliyu Adamu, ya amsa laifin saka wa mutumin guba a abinci domin ya mutum.

Daga bisani bayan bai mutum ba sai ya gayyato abokinsa, Mubarak Abdulsalam, suka kashe shi ta hanyar caccaka masa wuka.

Daga baya sai suka jefar da gawarsa, bayan sun kone ta da man fetur.

Akwai wani matashi, Sadiq Sunusi, wanda ya taimaka musu wajen kone gawar mutumin bayan sun kashe shi.

‘Yansanda sun gano gawar marigayin kuma suna ci gaba da gudanar da bincike.

Yanzu haka wadanda ake zargin na hannun ‘yansanda kuma za a gurfanar da su a gaban kotu bayan kammala bincike.

Kwamishinan ‘yansandan jihar, ya yi kira ga jama’a da su yi taka-tsantsan wajen yin mu’amala da mutane, musamman idan aka gayyace su wuraren da ba su sani ba domin yin kasuwanci ko taro.