Ministan harkokin wajen Benin Olushegun Adjadi Bakari, ya yi wa gwamnati da al’ummar Sin gaisuwar sabuwar shekara, a madadin gwamnati da al’ummar Benin.
Ya ce yayin da Sinawan dake kasar Benin da ma na sauran sassan duniya ke bikin sabuwar shekarar gargajiya, zai yi amfani da wannan dama wajen nanata muhimmancin da suke ba abota mai karfi da juriya dake tsakanin Benin da kasar Sin.
- Gwamnan Bauchi Ya Sanya Hannu Kan Dokar Da Za Ta Daƙile Satar Yara A Bauchi
- An Fitar Da Jerin Shirye-Shiryen Shagalin Bikin Bazara Na CMG Na Shekarar 2025
Ministan ya bayyana haka ne jiya Talata, yayin ganawarsa da jakadan Sin a Benin Zhang Wei, inda ya kuma bayyana fatan kara karfafa dangantakar dake tsakanin kasashen biyu.
Ya kara da cewa, karkashin jagorancin shugabanninsu, abota tsakanin kasashen biyu ya ci gaba da zurfi da samar da sakamakon moriyar juna.
Ya kuma bayyana kamanceceniyar dake akwai tsakanin shekarar Maciji ta kalandar gargajiya ta Sin dake alamta sauyi da juriya da basira da al’adar bautar Macijin Dan na kasar Benin, da ake dauka a matsayin mai bayar da arziki da hikima da zaman lafiya. (Mai fassara: Fa’iza Mustapha)
