Gwamnan jihar Bauchi, Bala Muhammad a ranar Talata ya rattaba hannu kan wasu sabbin dokoki guda biyu da nufin kyautata harkokin gudanar da mulki da kuma kula da yanayin tafiyar da harkokin rayuwa na yau da gobe.
Daga cikin dokokin akwai sabuwar doka ‘Executive Order 1, 2025’ wacce aka samar da ita da nufin kare yara ƙanana daga sacewa ko yin safararsu daga jihar zuwa wasu jihohin Kudu.
- Shirin “Rawar Yingge: Wakar Jarumai”
- Tawagar Jami’an Lafiya Ta Sin Ta Gudanar Da Binciken Lafiya Kyauta A Karkarar Sudan Ta Kudu
Dokar wacce za ta sanya ido kan yadda masu gidajen haya za su ke karɓar cikakkun bayanan mutane kafin ba su gida ko dakunan haya, sannan masu unguwanni da sarakuna za su ke sanya ido kan gidajen haya ta yadda za a gane mutum kafin ba shi damar zama.
Bugu da ƙari, dokar za ta bai wa direbobin da ke jigilar fasinjoji damar kula da yanayin fasinjojin da za su ɗauka ta yadda in sun ga yara dole sai sun tantance wanene ya ɗaukosu kuma meye nasabarsu dukka da nufin daƙile satar yara da safararsu.
Sannan gwamnan ya kuma sanya hannu kan dokar da ta bai wa kamfanonin sadarwa (Telecom Service Providers) dama ta yadda ba za a cajesu ko kwabo ba, da nufin inganta lamarin yanar gizo da inganta kamfanonin sadarwa domin jama’a suke morar amfani da tauraruwar ɗan adam da nufin sauƙaƙa harkokin kasuwanci a jihar.
Gwamnan ya yi gargaɗin cewa duk wani direban da ya ƙi bin umarnin da aka sanya na sanya ido kan yaran da ake safararsu doka za ta hau kansa. Sannan, ya ce ba za su lamunci yadda ake sace yaran jihar ana kaisu kudu.
Ya bayar da misalin baya-bayan da aka ceto wasu yaran jihar su uku daga jihar Anambra bayan da wata mata ta sace su a wani gidan haya. Don haka ne ya nemi Sarakuna da masu unguwanni da su ƙara bada tasu gudunmawar domin cimma nasarar kare yara ƙanana a jihar.
