Mun Kawo Ƙarshen Dogon Layin Mai Na Shekara 50 A Nijeriya – Matatar Dangote

Shugaba kuma Babban Jami’in Gudanarwa na Matatar Man Fetur na Kamfanin Dangote, Aliko Dangote, ya bayyana cewa tun bayan fara samar da man fetur a shekara guda da ta gabata, matsalar dogon layin man fetur da ta shafe shekara 50 ana fama da ita ta zama tarihi.

A yayin wani taron bita da aka gudanar don murnar cika shekara ɗaya tun bayan ƙaddamar da samar da man fetur daga masana’antar dake samar da ganga 650,000 a kowace rana, Dangote ya jaddada cewa Ƴan Nijeriya sun sha fama da dogon layin mai tun daga 1975, amma wannan matsala ta fara samun waraka tun lokacin da masana’antar ta fara aiki a ranar 3 ga Satumba, 2024.

• Matatar Dangote Ta Dakatar Da Zuwa Ɗaukar Man Fetur, Sai Dai Ka Saya Ta Kai Ma
• DAPPMAN Ta Soki Matatar Dangote Kan Rage Farashin Man Fetur

“Mun sha fama da dogon layi tun 1975, amma yau Ƴan Nijeriya na shaida wani sabon yanayi,” in ji shi.

Dangote ya yi nuni da ƙalubale da dama da masana’antar ta fuskanta tun lokacin kafuwarta, inda ya jaddada jajircewar kamfanin wajen ci gaba da tallafawa Nijeriya da Afirka baki ɗaya.

“Hanyar da muka bi na da ƙalubale saboda mun yi niyyar sauya tsarin downstream a Nijeriya. Wasu sun yi imani muna ci da guminsu ne, wanda hakan ba gaskiya bane. Abin da muka yi shi ne sanya ƙasarmu da nahiyarmu alfahari.

A baya, ƙasashe biyu kawai na Afirka ba sa shigo da man fetur, amma abin takaici, yanzu sun koma shigo da kaya. Wannan yana da illa ga Afirka,” in ji shi.

Dangote ya bayyana cewa aikin masana’antar ya kasance mai haɗari sosai. Ya ce ya samu gargaɗi sau da dama daga masana harkokin mai, masu zuba jari, da jami’an gwamnati na cikin gida da waje, waɗanda suka yi jayayya cewa irin wannan aikin masana’antar mai girma manyan ƙasashe ne kaɗai ke iya yi, ya amince cewa da aikin ya gaza, zai rasa dukiyoyinsa ga masu ba da rance.

“Yanke shawarar gina masana’antar ba abu ne mai sauƙi ba. Idan ya gaza, masu ba da rance za su daka wawa a dukiyoyinmu. Amma mun yi imani da Nijeriya da Afirka,” in ji shi.

Duk da adawar da ƙalubalen tattalin arziki, masana’antar ta rage farashin man fetur daga kusan Naira 1,100 kafin fara samarwa zuwa Naira 841 a yankunan Kudu maso Yamma, Abuja, Delta, Riɓers, Edo, da Kwara. Tare da ci gaba da amfani da motoci masu amfani da CNG, Dangote na sa ran wannan rage farashin da zai shafi ƙasa baki ɗaya nan ba da jimawa ba.

Dangote ya jaddada cewa manufar masana’antar ba ta maye gurbin ma’aikata ba, sai dai tana ƙirƙirar dubban sabbin damar aiki. Ana sa ran amfani da motoci 4,000 masu amfani da CNG zai samar da aƙalla ayyuka 24,000 a faɗin Nijeriya.

“Ba mu maye gurbin ma’aikata ba; muna ƙirƙirar ayyuka da yawa. Motocin CNG ba za su yi aiki da robot ba. Ma’aikatanmu na karɓar albashi sau uku fiye da mafi ƙarancin albashi. Direbobinmu na samun albashi mai rai, inshorar rayuwa, inshorar lafiya da ke rufe su, matan su, da har zuwa yara huɗu, har da fansho na rayuwa. Ba wai kawai muna ɗaukar direbobi ba, har ma da masu gyaran mota, manajoji na jirgin motoci, da sauran ƙwararru don tallafawa jirgin motoci na CNG.”