Akalla mutum 11 ne aka bayar da rahoton cewa sun mutu bayan sun ci abinci mai guba a kauyen Ikobi da ke karamar Hukumar Apa a Jihar Benuwai.
Kamar yadda ‘yan kauyen suka shaida wa wakilinmu, al’amarin ya auku ne a makon da ya gabata. Sun bayyana sunayen wadanda suka mutun da suka hada da: Adi Ale, Aipu Ochefije, Aboyi Ngbede Ochefije, Mary Ochoyoda, Ehi Abu, Blessing Abu, Peace Ochoyoda, Ojochono Daniel da kuma Fabour Edoh.
Sai dai kuma mai magana da yawun ‘yansandan Jihar Benuwai, Catherine Anene ta ce mutum bakwai ne suka mutu daga cikin 12 da abin ya shafa.
A cewarta, al’amarin ya auku ne bayan wata mata ta je gidan wasu ‘yan’uwanta da suka mutu sanadin cin abinci mai guba domin ta share gidan a watanni uku da suka gabata, daga nan ta dawo da wani ragowar abinci daga gidan, cikin rashin sani ta dafa ta bai wa wadannan mutanen 12 da abin ya shafa.
Al’ummar Ikobi dai na ci gaba da al’ajabin wannan lamari da ya auku.
