Nan Ba Da Jimawa Ba Harkar Man Fetur Za Ta Sauya A Nijeriya – Dangote

Alhaji Aliko Dangote, shugaban kamfanin Dangote, ya bayyana cewa nan gaba kaɗan za a samu babban sauyi a harkar man fetur a Nijeriya.

Ya bayyana haka ne a lokacin da shugaban ƙasa Bola Ahmed Tinubu ya kai masa ziyara a matatar mai ta kamfaninsa da ke yankin Lekki a Jihar Legas, wacce aka gina da kuɗin da ya kai dala biliyan 20.

• Wang Yi Ya Gabatar Da Jawabi Albarkacin “Ranar Tattaunawa Tsakanin Wayewar Kan Kasa Da Kasa” Karo Na Farko Na MDD
• Xi Ya Zanta Da Takwaransa Na Kasar Koriya Ta Kudu  

A cewar Dangote, wannan sauyi da ake jira ba wai kawai na saukar farashin man fetur ba ne, amma canji ne da zai shafi gaba ɗaya tsarin gudanar da harkokin mai a ƙasar.

Ya ce bayan wannan ziyara da shugaban ƙasa ya kai musu tare da ƙarin goyon baya da makamashi da ya ba su, nan ba da jimawa ba za a fara ganin sauyi daga gare su, kuma hakan zai shafi dukkanin fannin mai a Nijeriya.

Matatar man Dangote ta fara sayar d man fetur a watan Oktoban bara, lamarin da ya taimaka wajen rage farashin man a kasuwar cikin gida.

Sai dai wasu daga cikin dillalan man fetur a Nijeriya na ganin ya kamata matatar ta riƙa sayar da lita ɗaya ƙasa da Naira 800, la’akari da cewa ana sayar mata da ɗanyen mai a kuɗin Naira maimakon Dala.

Dangote dai ya nuna ƙwarin guiwar cewa kamfaninsa zai taka rawar gani wajen samar da isasshen mai ga ‘yan Nijeriya tare da sauƙaƙa matsin da mutane ke ciki sakamakon hauhawar farashin fetur a ƙasar.