Ministan wutar lantarki, Adebayo Adelabu, ya bayyana cewa Nijeriya na bukatar dala biliyan 10 a kowace shekara kafin kasar ta samu ingantacciyar wutar lantarki na tsawon shekara goma zuwa ashirin masu zuwa.
Ya yi wannan bayani ne a lokacin kaddamar da tashar wutar lantarki ta Solar PV da ta kasance mai karfin 600kW da 3MW a makarantar horar da sojojin Nijeriya da ke Kaduna.
- Adadin Wuraren Cajin Ababen Hawa Masu Aiki Da Lantarki Na Sin Ya Karu Da 47.6% A Shekara
- Majalisar Kano Ta Amince Da Dokar Wutar Lantarki Da Za Ta Raba Wa Jihohi 3 Wuta
Ya kara da cewa akwai matsalolin da aka fuskanta a baya, wanda dole ne a magance su domin wannan matakin zuba jari ya zama mai ma’ana.
“Lamba ta daya ita ce, tsarin dokoki da manufofi, wanda wannan gwamnatin ta cimma ta hanyar sanya hannu kan kudirin dokar makamashi zuwa doka.”
“Wannan doka ta tabbatar da ingantawa da tsarin wutar lantarki, tana ba dukkan matakan gwamnati tarayya, jiha, da kananan hukumomi dama a hukumance da kuma taka muhimmiyar rawa a cikin fannin wutar lantarki don amfanin al’umma a matakan kasa.”
“Wannan ya ba wasu jihohi fiye da goma sha daya ‘yancin kai, tare da karin wadanda ake sa ran za su biyo baya. Wadannan jihohin yanzu suna iya shiga cikin masana’antar wutar lantarki, daga samarwa har zuwa isarwa, rarraba, har ma da samar da mitoci.”
“Na biyu, dole ne mu magance rashin ingancin ababen more rayuwa, wanda ya taru a cikin shekaru 60 da suka wuce saboda rashin kula da rashin isasshen zuba jari don farfado da tsarin zamanantar da wutar lantarki.”
Ministan ya kuma jaddada bukatar cike gibin mita na sama da kashi 50 bisa dari, yana mai cewa shirin shugaban kasa yana nufin cimma wannan ta hanyar girka mita miliyan 18 a cikin shekaru biyar masu zuwa.
Ya ce an kaddamar da wutar lantarki ta tashar Solar PV mai karfin 600kW da 3MW a makarantar horar da sojojin Nijeriya domin bai wa gwamnatin tarayya kwarin gwiwa wajen magance karancin wutar lantarki.
Daraktan gudanarwa na Hukumar Wutar Lantarki ta Karkara (REA), Abba Abubakar Aliyu, ya bayyana kaddamar da aikin hasken rana na 2.5MW a matsayin wata mafita ga Nijeriya wajen samun wutar lantarki ga makarantun ilimi.
Ya kara da cewa hukumar ba kawai tana kaddamar fara wani aiki ba ne, tana kuma lura da tasirin zamantakewa, bincike, da ci gaban mai dorewa.
