Peng Liyuan, uwargidan shugaban kasar Sin Xi Jinping, kuma jakadiyar musamman ta hukumar bunkasa ilimi, kimiyya da raya al’adu ta MDD (UNESCO) domin daukaka ilimin mata da ’yan mata, ta aike da sakon taya murna ga bikin bayar da lambobin yabo ga wadanda suka bunkasa harkokin da suka shafi ilimin mata da ’yan mata, wanda ya gudana jiya Laraba a birnin Paris na Faransa.
Cikin sakonta, Peng ta jinjinawa hukumomin da suka lashe lambobin yabon daga kasashen Uganda da Zambia, tare da yi musu fatan alheri.
- Xi Ya Amsa Wasikar Wakilan Daliban Da Suka Halarci Gasar Kere-Keren Kimiyya Ta Kasa Da Kasa Ta Kasar Sin
- Li Qiang Ya Halarci Taron Majalisar Shugabannin Gwamnatocin Kasashe Mambobin SCO Karo Na 23
Ta ce har kullum, kasar Sin ta kasance mai bayar da matukar muhimmanci ga harkokin da suka shafi ilimin mata da ’yan mata da ingiza burin duniya kan ilimin mata da ci gaba da inganta muhallin neman ilimi ga mata a kasar.
Peng Liyuan ta kara da cewa, a matsayinta na jakadiyar UNESCO kan daukaka ilimin mata da ’yan mata, a shirye take ta hada hannu da duk wani bangare domin hada karfi da karfe da nufin cimma daidaiton jinsi da burin duniya kan harkokin da suka shafi mata. (Fa’iza Mustapha)
