Ranar Tattaunawa Tsakanin Wayewar Kan Kasa Da Kasa: Sabon Tunani Don Wanzar Da Zaman Lafiya Da Daidaito A Duniya

Kamar yadda duk mai bibiyar al’amuran dake wakana a duniya ya kwana da sani, an gudanar da bikin ranar tattaunawa tsakanin wayewar kan kasa da kasa ta MDD a karo na farko a Talata da ta gabata, kuma hankulan duniya sun karkata ga wannan manufa ta yunkurin dinke duniya waje guda, wanda masharhanta da dama ke kallo a matsayin yunkuri na kusanto da sassan wayewar kai na kasashen duniya daban daban, musamman a gabar nan da ake ta fuskantar rarrabuwa, da rashin fahimtar juna, da tashe-tashen hankula dake neman zama ruwan dare.

Idan mun waiwayi tarihi, za mu ga cewa shugaban kasar Sin Xi Jinping ya gabatar da mahangar ingiza wayewar kan daukacin sassan kasa da kasa ta GCI cikin watan Maris na shekarar 2023, inda manufar ta fadada zuwa muhimmin ginshiki na cudanyar Sin da sauran sassan duniya.

• Ba Zan Bar Nijeriya Ta Zama Kasa Mai Jam’iyya Daya Ba – Tinubu
• Zamfara: APC Za Ta Maka PDP A Kotu Kan Zargin Matawalle Da Hannu A Satar Mutane

Wannan manufa tana gudana kafada-da-kafada da takwarorinta, irin su shawarar samar da ci gaban daukacin duniya ko GDI, da ta inganta tsaron duniya ko GSI. Hadakar wadannan manufofi uku, ta samar da wata kyakkyawar alkibla ta gina al’ummar duniya mai makomar bai daya ga daukacin bil’adama.

Idan mun nazarci manufar nan ta tattaunawa tsakanin wayewar kan kasa da kasa ta MDD, wadda aka yi bikinta a baya bayan nan, za mu ga cewa an gina ta ne kan ginshikai hudu, wato martaba bambance-bambancen wayewar kai, da yayata bukatar gina akidun bai daya na bil’adama, da wanzar da zaman lafiya, ci gaba, adalci, gaskiya, dimokaradiyya, da yanci. Sauran su ne dagewa wajen gadarwa, da kirkire-kirkire a fannin kare wayewar kan bil’adama, da kuma tallafawa ingantaccen salon hadin gwiwa da musaya tsakanin al’ummun sassan kasa da kasa.

Wadannan ginshikai sun kara yayata akidun MDD, na kira da a hada kai tare da dukkanin bambance-bambance, da wanzar da zaman lafiya da daidaito tsakanin al’ummun duniya. Manufar wayewar kan daukacin sassan kasa da kasa ta GCI, ba wai tana kokarin samar da wani salo daya tilo da za a tursasa biyayyarsa ba ne, maimakon haka, tana fatan ganin an rungumi dukkanin nau’o’in wayewar kai ne, ta yadda za su samar da alfanu, da damar koyi daga juna.

A wannan lokaci da wasu sassa ke kafa shingaye, GCI na gina gadoji. Manufar na kuma karfafa gwiwar tattaunawa, da gudanar da shawarwari tsakanin sassan duniya masu bambance-bambance, ta yadda za a kafa managarcin tsarin hadin kan bil’adama mai dorewa. GCI da ranar tattaunawa tsakanin wayewar kan kasa da kasa ta MDD, za su kara zamewa duniya muhimman manufofi na “tafiya tare a tsira tare”!(Saminu Alhassan)