A cikin kwanakin baya, an yi ta samun albishir ta fannin nazarin kimiyya da fasaha a kasar Sin.
A ranar 19 ga wata, kamfanin Huawei na kasar Sin ya kaddamar da kamfutar da ke dauke da manhajar sarrafa aikin kamfuta na HarmonyOS da ya kirkira, lamarin da ya alamanta muhimmin ci gaban da kasar Sin ta samu ta fannin kera manhajar sarrafa aikin kamfuta, wanda ya sauya yanayin babakere da kamfanonin Microsoft da Apple suka kafa. Sai kuma kashegari, kamfanin Xiaomi na kasar ta Sin ya sanar da fara samar da sassan na’urorin laturoni na Chips samfurin Xring 01 da ya kirkira, matakin da ya sake nuna babban ci gaban da aka samu a babban yankin kasar Sin ta fannin nazarin sassan na’urorin laturoni na Chips nau’in 3nm.
- Hajji: NAHCON Ta Kammala Jigilar Kashi 77 Na Mahajjatan Nijeriya Zuwa Saudiyya
- Gwamnan Filato Ya Kafa Kwamiti Don Binciken Hare-Haren Da Ake Kai Wa A Jihar
Al’amuran sun sake nuna gazawar Amurka wajen hana ci gaban ayyukan nazarin kimiyya da fasaha na zamani a kasar Sin, duk da kokarinta na yi wa kasar kafar ungulu.
A cikin ‘yan shekarun baya, Amurka na kallon bunkasar kimiyya da fasaha na kasar Sin a matsayin babbar barazana a gare ta, don haka, take ta kokarin yi wa kasar kafar ungulu tun daga fannin samar da sassan na’urorin laturoni na Chips zuwa na na’urorin samar da su, don neman dakile ci gaban masana’antun samar da kayayyakin zamani na kasar Sin. Ko a makon da ya gabata, ma’aikatar kasuwanci ta kasar Amurka ta fitar da sanarwa game da sabbin dokokin tsaurara kayyade fitar da sassan na’urorin laturoni na Chips zuwa ketare, inda har ta bayyana amfani da sassan na’urorin laturoni na Chips na Ascend kirar kamfanin Huawei na Sin a matsayin abin da ya keta dokokin.
Ma’aikatar kasuwanci ta Amurka ta bayyana a cikin sanarwar cewa, dalilin kayyade yin amfani da sassan na’urorin laturoni na Chips na Ascend kirar kamfanin Huawei a kasuwannin duniya shi ne, don “kiyaye fifikon kasar Amurka ta fannin nazarin fasahar kirkirarriyar basira ta AI, lamarin da ya bayyana me take nufi da manufarta ta sanya “Amurka a gaba da kome”. Sai dai, don kiyaye karfinta da fifikonta, a maimakon ta inganta aikin kirkire-kirkire da kuma hadin gwiwa da sauran kasashe, sai ta dauki matakai na kashin kai da kariyar ciniki, don dakile ci gaban sauran kasashe a fannin.
Amma kuma kariyar ciniki ba za ta taimaka ga raya sana’o’i da masana’antu a duniya ba. Idan mun lura, a cikin shekaru 10 da suka wuce, yadda kasar Amurka ta dauki matakai na kare sana’o’in samar da karafa, a maimakon ya hana raguwar guraben ayyukan samar da karafa, sai ya haifar da karuwar kudaden da sana’o’i masu alaka suka kashe. Haka al’amarin yake ma ta fannin samar da sassan na’urorin laturoni na Chips da fasahohin kirkirarriyar basira, domin rashin yin takara da hadin gwiwa da sauran kasashe ba zai haifar da da mai ido ba, illa koma baya da illoli ga sana’o’i masu alaka.
A bangaren kasar Sin kuma, yadda kasar Amurka ke yi mata kafar ungulu don dakile ci gabanta, ya sa wa kamfanonin kasar kaimin gaggauta kirkire-kirkire, don neman tsayawa da kafafuwansu a fannin kimiyya. Idan ba mu manta ba, a farkon bana, kamfanin DeepSeek mai nazarin fasahar kirkirarriyar basira na kasar Sin ya fitar da tsarin R1 da ingancin aikinsa ya kai matsayin na sauran tsarukan AI masu matsayin koli na duniya. Har ma jaridar Financial Times ta kasar Burtaniya ta yi sharhin cewa, babban kuskure ne ga Amurka yadda take neman dakile ci gaban kasar Sin. Abubuwan da suka wakana a tarihi sun shaida mana cewa, ci gaban fasahohi su kan samu ne daga rikici da takara da juna, a maimakon zaman walwala. Ita kuma tsohuwar mukaddashiyar mai mataimaka wa sakataren harkokin wajen kasar Amurka, Susan Thornton, ta yi nuni da cewa, matakan kayyadewa da Amurka ta dauka, a hakika sun yi matukar samar da kuzari ga kasar Sin ta fannin kirkire-kirkire, inda Deepseek ya shaida hakan. Ta ce, “ba zai yiwu Amurka ita kadai ta mallaki fasahar kirkirarriyar basira ba, kamata ya yi gwamnatin Amurka ta yi watsi da kariyar ciniki da ma kiyayya da take wa kasar Sin, kuma ta yi hadin gwiwa da kasar, don samar da alfanu ga dukkanin bil-Adama bisa fasahar kirkirarriyar basira.”
Ma iya cewa, Madam Susan Thornton mai idon basira ce game da bunkasar sana’o’i masu alaka da fasahar kirkirarriyar basira. Lallai kawo tarnaki ga wasu ba ya kara wa mai yin hakan sauri da kuzarin tafiya. Matakan da kasar Amurka ke dauka na neman dakile ci gaban kasar Sin, ba zai haifar da kome ba, illa su sa kasar ta Sin ta kara karfinta da gaggauta ci gabanta. Sabo da kamar yadda a kan ce, sara da sassaka ba ya hana gamji toho.
