Fasahar kirkirarriyar basira ta AI, da mutum-mutumin inji, da sauran fasahohin zamani suna kara yin tasiri ga rayuwarmu. A cikin wannan hali, me ya kamata ‘yan Afirka su yi? Shin ya kamata su nade hannu su jure duk wani tasirin da sabbin fasahohi suke haifarwa? Ko kuma su shiga ayyukan nazarin kimiyya da fasaha, da na kula da harkoki masu nasaba da sabbin fasahohi, da more ingantacciyar rayuwa da ci gaban fasahohi ya haifar? A kan wannan batu, kasar Sin har kullum tana fatan ganin kasashen Afirka sun dauki dabara ta biyu.
A yau Alhamis aka rufe taro kan Intanet na kasa da kasa na Wuzhen na bana, wanda ya gudana a birnin Wuzhen na kasar Sin. Wani sakamako na taron shi ne yadda aka fitar da “Shawarar Gina Tsarin Fasahar AI Mai Budadden Bayani A Duniya”. Wannan shawarar ta jaddada bukatar hadin gwiwar dukkan kasashe a harkokin da suka shafi fasahar AI, wadda ta nuna ra’ayin kasar Sin na bude kofa da neman amfanar da kowa, dangane da fasahar zamani ta AI.
Hausawa su kan ce “Kyan alkawari cikawa”. To, ta yaya kasar Sin ke cika alkawarinta a wannan fanni? Bari mu kalli yadda kasar ke amfani da tsarinta na gargadin yanayi mai amfani da fasahar AI, wato “Mazu”, wajen hidimtawa mutanen Afirka. A Djibouti, “Mazu” na iya fitar da gargadin yanayi mai tsanani, inda yake samar da kariya ga ayyukan tashar jiragen ruwa. A Habasha, ana amfani da tsarin “Mazu” wajen tinkarar ambaliyar ruwa da zaftarewar kasa. Yayin da sauran kasashen Afirka, kamar su Najeriya, da Kamaru, da Guinea, da Kodibwa, su ma suke shirin kaddamar da tsarin “Mazu” a cikin gida.
Kana wani abu mafi mahimmanci shi ne, hadin gwiwar kasar Sin da kasashen Afirka a wannan fanni yana da nufin ba su damar fitar da gargadin yanayi mai tsanani bisa karfinsu. Dangane da batun, sakatare Janar na Majalisar Dinkin Duniya, Antonio Guterres ya ce, “Wannan shi ne ainihin tsarin hadin gwiwa da duniya ke bukata, wato a taimaka wa kasashe ta hanyar mika fasaha, da gudanar da bincike tare, da karfafa musu kwarewar aiki, ta yadda za su iya kare mutanensu.”
A nasu bangare, mutanen kasashen Afirka sun fahimci ra’ayin kasar Sin, kuma sun yaba da tasirin da kasar ke bayarwa kan batun tabbatar da daidaiton fasahar zamani a duniya. Kamar yadda jaridar kasar Namibia ta “Windhoek Observer” ta wallafa wata makala a kwanan baya, wadda ta yaba wa kasar Sin kan yadda take karbar bakuncin taro kan Intanet na kasa da kasa na Wuzhen a ko wace shekara, inda ake cewa, taron Wuzhen ya shafi makomar ayyukan yanar gizo ta Intanet, wato ko fasahar dijital za ta kasance karkashin mallakar wasu kamfanoni, ko kuma za a hada karfin bangarori daban daban na duniya, don raya fasahar, da more ta tare. (Bello Wang)
