Sojoji Sun Ceto Mutane 2 Daga Hannun Mahara A Benue

Dakarun Sojin Nijeriya sun ceto mutane biyu daga hannun waɗanda ake zargin masu garkuwa da mutane ne a kan hanyar Naka zuwa Ahume, a Jihar Benue.

Sojojin da ke ƙarƙashin rundunar Operation Whirl Stroke sun ceto mutanen ne a ranar 24 ga watan Oktoba, bayan musayar wuta da waɗanda ake zargin masu garkuwa da mutanen ne, waɗanda suka tsere.

Ɗaya daga cikin waɗanda aka ceto, Mngunengen Ihom, mai shekaru 36, ta samu raunuka sakamakon sara da adda, kuma an kai ta Babban Asibitin Naka domin yi mata magani.

Rundunar ba ta bayyana sunan mutum na biyu da aka ceto ba.

Rundunar ta buƙaci mazauna yankin su riƙa bai wa jami’an tsaro sahihan bayanai domin taimakawa wajen yaƙi da ayyukan laifuffuka.