Trump: Yadda Sabuwar Dokar Hana Shiga Amurka Ta Fi Shafar Musulmai Da Afirka

Sabon umarnin shugaban Amurka, Donald Trump, na hana matafiya daga ƙasashe daban-daban shiga Amurka ya fara aiki a ranar Litinin da misalin ƙarfe 5 na yamma.

Wannan mataki wani ɓangare ne na manufofinsa na taƙaita ƙauran jama’a zuwa Amurka, musamman daga ƙasashen da yake kallon suna da barazana ga tsaron ƙasar.

• Mataimakin Firaministan Sin Ya Gana Da Ministar Kudin Birtaniya
• Gwamnatin Bauchi Ta Buɗe Sabon Tsarin Neman Ƙirƙirar Sabbin Masarautu

Ƙasashe 12 ne aka haramta musu shiga Amurka gaba ɗaya, ciki har da Afghanistan, Myanmar, Chadi, Jamhuriyar Congo, Equatorial Guinea, Eritrea, Haiti, Iran, Libya, Somalia, Sudan da Yemen.

Baya ga haka, an ɗora haramcin rabi da rabi kan ƙasashe bakwai: Burundi, Cuba, Laos, Saliyo, Togo, Trkmenistan da Venezuela.

Wannan umarni ya faru ne a daidai lokacin da ake ci gaba da sukar manufofin Trump, musamman waɗanda ake kallon suna nuna bambanci ko wariya, musamman ga ƙasashen da yawancin Musulmai ne ko kuma ƙasashe masu tasowa a Afirka.

A wa’adinsa na farko a 2017, Trump ya kafa irin wannan haramci da ya shafi ƙasashe bakwai ns Musulmai, wanda ya jawo gagarumar suka daga ƙasashen duniya da ƙungiyoyin kare haƙƙin ɗan Adam.

Masana harkokin tsaro da na diflomasiyya na ganin cewa wannan sabon mataki na iya ƙara tsamin dangantaka tsakanin Amurka da ƙasashen da abin ya shafa, musamman a lokacin da ake buƙatar haɗin kai tsakanin ƙasashen duniya wajen fuskantar manyan ƙalubale na tsaro da tattalin arziƙi.