Tsohon Firaministan Kenya, Odinga, Ya Iso Nijeriya Don Halartar Taron LEADERSHIP Na 14

A yau litinin ne, tsohon firaministan kasar Kenya, Raila Amolo Odinga ya iso Nijeriya domin halartar taron shekara-shekara da jaridar LEADERSHIP ta saba gudanarwa. 

Odinga, ya sauka ne a filin tashi da saukar jiragen sama na Nnamdi Azikiwe da ke babban birnin tarayya, Abuja.

• Gabanin Taron Jaridar LEADERSHIP, Raila Odinga Zai Gana Da Ahmad Lawan

Ya iso kasar ne, kafin a fara gudanar da taron na jaridar LEADERSHIP karo na 14 wanda za a karrama wasu manyan mutane.

Za a gudanar da taron ne, a ranar 31 ga watan Janairu a babban birnin tarayya, Abuja.

Odinga, shine babban bako mai magana a taron yayin da mataimakin shugaban kasa Farfesa Yemi Osinbajo zai jagoranci zaman.

Fitaccen kwararren dan siyasar ya iso Nijeriya ne da misalin karfe 12:10, inda mahukuntan jaridar LEADERSHIP da wasu manyan jami’an gwamnatin tarayya suka tarbeshi.

LEADERSHIP ta rahoto cewa, tuni tawagar tsohon Firaministan ta iso Nijeriya a ranar Lahadin da ta gabata.