Wang Yi Ya Gana Da Sabon Jakadan Amurka A Sin

Jiya Talata, mamban ofishin siyasa na kwamitin tsakiyar Jam’iyyar Kwaminis ta kasar Sin, kana, ministan harkokin wajen kasar Wang Yi ya gana da sabon jakadan kasar Amurka dake kasar Sin David Perdue.

Da farko, Wang Yi ya yi maraba da zuwan Perdue kasar Sin, ya kuma yi fatan cewa, zai zama mai karfafa mu’amala a tsakanin Sin da Amurka, da taimakawa wajen warware sabani tsakanin Sin da Amurka, da kuma ciyar da hadin gwiwar dake tsakanin kasashen biyu gaba, domin ba da gudummawa wajen raya dangantakar dake tsakanin kasashen Sin da Amurka kamar yadda ake fatan gani.

• Gwamnan Katsina Ya Bukaci Hadin Gwiwa Da ‘Yan Kasuwa Domin Cigaban Jihar
• Karuwar Darajar Sana’ar Samar Da Kayan Laturoni Da Dangoginsu a Sin Cikin Watanni 4 Na Farkon Bana Ya Karu Da 11.3% 

Wang Yi ya ce, nuna adalci da girmamawa shi ne tushen sada zumunci a tsakanin bangarorin biyu, kana, yin mu’amala da hadin gwiwa su ne hanyoyi kadai da za su amfani kowa da kowa.

Haka kuma, Wang Yi ya jaddada cewa, bayan tattaunawar da Sin da Amurka suka yi kan batutuwan raya tattalin arziki da cinikayya a birnin Geneva, kasar Sin ta aiwatar da ra’ayin daya da aka cimma yadda ya kamata. Amma, abin da ya bakanta ran kasar Sin shi ne, kwanan baya, kasar Amurka ta fitar da jerin matakai wadanda suka illata moriyar Sin, kuma Sin ta nuna adawa da hakan.

Kazalika, ya kamata kasar Amurka ta hada kai da Sin, yayin aiwatar da ra’ayi daya da shugabannin kasashen biyu suka cimma a watan Janairu na bana, domin samar da damammaki na kyautata dangantakar dake tsakanin sassan biyu.

A nasa bangare kuma, David Perdue ya ce, shugaba Donald Trump yana matukar girmama shugaba Xi Jinping, kuma yana da muhimmanci a ci gaba da karfafa mu’amala dake tsakanin shugabannin biyu. A matsayin jakadan kasar Amurka a kasar Sin, yana fatan yin mu’amala da bangaren Sin yadda ya kamata, bisa ka’idar girmama juna, da sauraron ra’ayoyin juna. (Mai Fassara: Maryam Yang)