Wani dan Boko Haram mai suna Sajeh Yaga, ya mika kansa ga dakarun Operation Hadin Kai a jihar Borno.
An tattaro cewa, dan ta’addan, wanda ya tsere daga sansanin Boko Haram da ke Yale, a dajin Sambisa, ya mika kansa ga dakarun bataliya ta 112 a Mafa a ranar 28 ga Afrilu, 2024.
A cewar wani kwararre mai sharhi kan yaki da tada kayar baya a yankin tafkin Chadi, Zagazola Makama, ya bayyana cewa, dan ta’addan ya mika wuya ne tare da bindiga kirar Ak47 guda daya, Mujallun AK47 guda hudu da wayar hannu ta Tecno guda uku da sauran kayayyaki.
