Wasu ‘Yan Ta’adda Dauke Da Makamai Sun Harbi Limamin Katolika A Binuwe

Wasu ‘yan bindiga da ake zargin makiyaya ne da suka kai hari tare da harbe wani limamin Katolika, Rabaran Fr. Solomon Atongo,a kan hanyar Makurdi/Naka dake Karamar Hukumar Gwer ta yamma a Jihar Binuwe.

A cewar wata majiya, limamin cocin Katolika, wanda limamin cocin Jimba ne, yana tuki ne a kan hanyar Makurdi/Naka, lokacin da wasu da ake zargin makiyaya ne dauke da makamai suka harbe shi a kusa da Tyolaha.

• Darajar Cinikayyar Waje Ta Sin Ta Karu Da Kaso Shida Bisa Dari A Afirilu
• Tsaro Ya Inganta A Zamfara, In Ji Gwamna Lawal Yayin Tattakin Zaman Lafiya Na Tarihi A Jihar

An ce wani jami’in tsaro da ke sintiri a yankin ne ya gano malamin, wanda ya kai shi wani asibiti da ba a bayyana ba.

A nasa martanin, Bishop na cocin Katolika na Makurdi, Most Reb Wilfred Anagbe, ya yi kira da a yi addu’a cikin gaggawa yana mai cewa limamin cocin yana asibiti.

A wata wasika mai kwanan wata a ranar asabar 24 ga watan Mayu 2025 mai dauke da sa hannun shugaban cocin Katolika na Makurdi, Reb Fr Shima Ukpanya, a madadin limamin cocin, ya ce bukatar addu’ar shi ne don samun sauki cikin gaggawar limamin cocin.

Wasikar ta kara da wani bangare cewa, “Na rubuta a madadin Bishop Catholic Diocese na Makurdi, Most Reb Wilfred Chikpa Anagbe, domin addu’arku ta neman sauki ga daya daga cikin limaman cocinmu, Rabaran Solomon Atongo, wanda wasu da ake zargin makiyaya ne suka kai masa hari tare da harbe shi da yammacin yau a kusa da Tyolaha, titin Makurdi/Naka, a Karamar Hukumar Gwer ta yamma.”

Mai magana da yawun rundunar ‘yansandan jihar Catherine Anene ba ta amsa kiran da aka yi mata ba har zuwa lokacin hada wannan.